الجمعة، 3 يوليو 2009
بيان هام : اخر الاخبار
مرسلة بواسطة أم فريده في 12:55:00 ص 37 التعليقات
الثلاثاء، 30 يونيو 2009
كيف تقتل زوجتك دون أن تكتشف الشرطة
تحذير لكل الزوجات انتبهوا و خذوا ,,
الاحتياطات اللازمة
طبعا والبنات على اعتبار ما سيكون
قرأ صعيدي في إحدى الصحف
مرسلة بواسطة أم فريده في 4:00:00 ص 49 التعليقات
الأربعاء، 24 يونيو 2009
كأنه لم يكن حبيبها
عند زوج اختها واختها حيث يعملا هناك ويساعداهم ويبعث زوج اختها التذكرة والفيزا هدية
ولكن لم يوفق فيعود


مرسلة بواسطة أم فريده في 4:03:00 م 36 التعليقات
الأربعاء، 1 أبريل 2009
خلاص انتهى عهد العند وعصر التدوين
مرسلة بواسطة أم فريده في 7:56:00 م 27 التعليقات
الاثنين، 30 مارس 2009
جانى تاجين من ارق اتنين

باين عليا هقول شعر ولا ايه
المهم
انا جانى من احساس طفله واقعيه محبه للرومانسيه
احنا لسه اصحاب جداد
بس شوفت فى كتاباتها رقه وواقعيه عجيبه
وتاج من ايمان صحبتى اللى بحس
اننا اصحاب من زماااااااااااان
اسمك؟
زوجه عنيدة جدا
المشهور بيه وسط اصحابك؟
كوكى (جوزى اطلق عليا الاسم دة يعنى حصرى مش للاستخدام)
بس اصحابى بيقولولى يا ايمى
سنك؟
24سنه
مجال دراستك؟
علم الاجتماع(أداب علم اجتماع)
اسم مدونتك؟
زوجه عنيدة جدا
صورتك الرمزية فى المدونة بتعبر عن ايه؟
هى صورة كرتونيه لعروسه"انمى"
اصلى بحب الكرتون
وبتعبر عنى زوجه
هل فكرت فى اغلاق المدونة ؟ والسبب؟
اه
انا كان عندى مدونه قبل كدة وقفلتها
والسبب ان وقتها جوزى كان خطيبى ورفض
فكرة التدوين
وكمان انا كنت لسه بشتغل ومش فاضيلها اوى
ايه رد فعلك لو حد قل ادبه فى تعليق ؟
همسح التعليق واعتبر انى مش شوفت حاجه
ومجرد انى اشوف اسمه بعد كدة همسح الرساله من غير ما اقراها
اسوأ مدونه؟
الصراحه مشفوفتش لحد دلوقتى
هيحصل ايه للايميل بعد ماتموت؟
هتفضل زى ما هى لان محدش هيشوفها
اديت الباسوورد لحد قبل كدة؟
اه اختى الصغيرة
لانى غالبا لو قفلت المدونة هديهالها
ماهى زى بنتى انا اللى مربيها
وبحبها اوووووووووووى
الموود بتاعك ايه ؟
متقلبه
بس حساسه اوى كلمه تزعلى وكلمه تفرحى
وبأخد على خطرى لو حد معمليش اعتبار
بتعما ايه فى اوقات فراغك؟
عندى من دة كتيييييييييييييييير جدا
لانى بلا عمل
بلا زوج فى الوقت الحالى
وقريبا بلا مدونة
لا شئ
اتفرج على التليفزيون
والحمد لله ان لسه متلغاش من المقرر
الأكلة المفضلة ؟
بحب كل الاكل
بس بعز الصوانى مش بحب الطبيخ
وبحب التيك واى
يعنى الاكل بره
وبموت فى الشيكولالالالالالالالالالالالالالالالالالالالاته
الصفات التى اخذتها من والدك؟
العقل والبعد عن العواطف فى الحكم على الامور
وحب القراءة والنظام والعصبيه وقوة الشخصيه
وحب العمل
وحاجات كتييييييير اوى
اصلى نسخة منه
الصفات التى اخذتها من والدتك؟
الطيبه اللى واضح انها ورايا ورايا
والحنيه وحب الاطفال
وحب الناس
اكتر ست حاجات بتكرههم ؟
الكذب لانه بيوصل للخيانه
والنفاق لانهن الواحد سعتها بيكون برضه كذاب
القسوة اصلى بحب الحنيه
وقله الحيله لما احس انى مش قادرة اعمل حاجه لحد محتاجنى
والغدر انك تكون مأمن لحد ويغدر بيك
والبخل بكره مووووووووت
اكتر ست حاجات بتحبهم ؟
جوزى بموت فيه ربنا يحميه ويخليهولى
وماماوبابا واخواتى
اخويا محمد بمووووت فيه
عشان ظروفه خاصه
الحناااااااااااان
شخصيتك نوعها ايه ؟
بيقولوا عليا فى البيت عصبيه وشخصيه قويه
وعنيدة ومش بسمع الكلام
وفى عالم التدوين طيبه
لماذا دخلت عالم التدوين من الاساس؟
لما الدنيا ضاقت بيا
وملاقتش حد يسمعنى ولا يفهمنى
وكان صعب انى احكى لاقرب الناس
وكنت عايزة حكم موضوعى على اللى انا كنت فيه
والصراحه ساعدتونى كتيييييييييييييير
اوى
وبالمناسبه عايزة اشكركوا على مساعدتكوا ليا
وبالاخص ستوتة اصلى تعبتها معايا اوى
وكل شويه اقولها شوفيلى حل تانى
احلى جملة قيلت فى وصف مدونتك؟
كل الكلام اللى كان بيتقال كان بيفرحنى من تعاطف معايا
ومحاوله انهم يلاقولى حل
او يهونوا عليا
اهمية التعليقات بالنسبالك؟
هى اللى كانت بترد روحى وانا غرقانه ومحتاجة المشورة
احلى بوست كتبته؟ضع اللينك بتاعه؟
صعب اعيش
عشان كتبته لجوزى حبيبى اللى بحبه اوى من كتر حبه فيا
"بس مش عايزة أر"
http://moniimooon.blogspot.com/2009/03/blog-post_1002.html
افضل مدونة قرأتها؟
انا لما يجيلى ضيف بحب ارد الزيارة ولما بتعجبنى
مش بفوت بوست الا لما اروح واقرا واعلق
واكيد لازم احط اللينك بتاعه عندى عشان اشوف الجديد
ولما يتاخر اسال عنه
افضل بوست قرأته؟
هما الصراحة اتنين
الاول عند ستوته "البصه فى عينك بتلاتين سنه جواز"
والتانى عند ايمان"الرسول(ص) فىشقتى الجديدة
مسئوليه وحياه
بس الراحة نعمه
الانترنت بالنسبالك ايه ؟
بقضى فيه وقت فراغى وبيهون على الوقت لحد ما اروح لجوزى
بس انا من زمان بعتبره نافذة على العالم
من غيرة بحس انى قاعده فى اوضه مقفوله
تمرر التاج ده لمين ؟
Bondoka
Baraie girl
موناليزا
زوجه مخنوقه
حاسوباتيه
يوم جديد
عاشقة وغلبانه
بسمه صلاح
عاشقة القمر
عاشقة الاحزان
كان نفسى اديه لناس كتير بس فى ناس رحلهم قبلى وناس كتير هيرحلهم من اللى انا بعتلهم
:)
مرسلة بواسطة أم فريده في 11:37:00 م 43 التعليقات
الخميس، 26 مارس 2009
كيف تستطيع أن تعيش 60 سنة زواج
ولم تدخل المشاكل أبداً إلى بيت هذين الزوجين السعيدين
هنا أرسلت الصحيفة أكفأ محرريها ليعد تحقيقاً مع الزوجين المثاليين ، و ينشره ليعرف الناس كيف يصنعون
حياة زوجية سعيدة
المهم ، المحرر قرر أن يقابل كلا الزوجين على انفراد
ليتسم الحديث بالموضوعية وعدم تأثير الطرف الآخر عليه .
و بدأ بالزوج
- سيدي ، هل صحيح أنك أنت و زوجتك عشتما ستين عاماً
في حياة زوجية سعيدة بدون أي منغصات ؟
- نعم يا بني
- وايلام يعود الفضل في ذلك ؟- يعود ذلك إلى رحلة شهر العسل ، فقد كانت الرحلة إلى أحدى البلدان التي تشتهر بجبالها الرائعة
وفي أحد الأيام ، استأجرنا بغلين لنتسلق بهما إحدى الجبال حيث كانت تعجز السيارات عن الوصول لتلك المناطق .
و بعد أن قطعنا شوطاً طويلاً ، توقف البغل الذي تركبه زوجتي
ورفض أن يتحرك .. غضبت زوجتي و قالت : هذه الأولى !!!
ثم استطاعت أن تقنع البغل بمواصلة الرحلة .
بعد مسافة ، توقف البغل الذي تركبه زوجتي مرة أخرى ورفض أن يتحرك .. غضبت زوجتي و صاحت قائلةً : هذه الثانية !!! ثم استطاعت أن تقنع البغل بمواصلة الرحلة
بعد مسافة أخرى ، وقف البغل الذي تركبه زوجتي و أعلن العصيان كما في المرتين السابقتين
فنزلت زوجتي من على ظهره
وقالت بكل هدوء : وهذه الثالثة !!!
ثم سحبت مسدساً من حقيبتها ، وأطلقت النار على رأس البغل فقتلته في الحال .
ثارت ثائرتي ، و انطلقت أوبخها :
لماذا فعلت ذلك ؟ كيف سنعود أدراجنا الآن ؟كيف سندفع ثمن البغل ؟
انتظرت زوجتي حتى توقفت عن الكلام
ونظرت إليّ بهدوء و قالت :
هذه الأولى ..!!!!!!
انا جوزى بعتلى الايميل دة وفطست على نفسى من الضحك
مرسلة بواسطة أم فريده في 3:36:00 م 47 التعليقات
الأربعاء، 25 مارس 2009
صعب اعيش
فى لحظة قرأتك لهذه الكلمات لن نكون سويا
ستكون بعيد عنى للمرة الثانية
لكن
هذة المرة ستكون انت بأنتظارى ولست انا
وستكون اخذت قلبى معك
لانك الان زوجى وحبيبى
ولست
حبيبى فقط
يا اغلى ما فى عمرى
يا من ملكت القلب والروح
فى يوم من ايام حياتى
تمنيت ان اجد الرجل الذى يعرف
الحب
اكثر منى ليعلمنى
كيف هو الحب؟؟؟
ليحبنى وحدى
واحبه وحده ولا يرى سواى احد
واكون انا محور حياتة ومصدر سعادته وابتسامته
أريد ان اكون لك الدنيا التى تتمناها
وأريد منك الحنان والأمان
أريدك أن تقول لى ما تعرفة عن الحب وما لاتعرفة
دعنى اعيش دنياك
وعلم قلبى لا ينبض الا بحبك
لقد كنت حلم وأنت الان الحقيقة الوحيدة
التى اعيش من اجلها
سأدعو الله
ان يجعلنى زوجة صالحة لك
وان تكون زوجا صالحا لى
وان تكون عونا لى
وان اكون عونا لك
اللهم بارك لنا فى زيجتنا هذة و زدنا علما نافعا نربى
به ابنائنا
ودينا صالحا نجعله طريقا لنا
اللهم أعنى وساعدنى لأكون زوجة صالحة تطيعه
فيما أمرت
اللهم اجعله زوجا صالحا يحبنى ويرعانى انا واولاده
ان شاء الله
دى كانت احدى رسائل كتبتها لجوزى قبل الزواج
ولم يقرأها الا بعد الزواج
لاننى خجلت انه يقرأها قبل الزواج

شكوت منه وتضايقت من عصبيته
احيانا
ولكنه واحشنى جدا
فى لحظة مسح دموعى لما بكيت
فى ثانية عمل حاجة مش كان عايز يعملها عشان يرضينى
وبقوله صعب اعيش من غيره
واحشنى
مرسلة بواسطة أم فريده في 12:58:00 ص 55 التعليقات
الأحد، 22 مارس 2009
امى.... زوجى .....كرامتى
وكنت مقتنعة تماما بيها
كان راى اغلب الناس فى موضوع
حماتى حياتى
"من امنك لم تخونة..."
انى اروح ازورها وده واجب عليا
ولما سألت جوزى
قالى لو عايزة تروحى روحى
وانك لما تروحى هتكسفيها
فقلتلة:انا مش عايزة اكسفها انا رايحة عشانك انت
وانا عمرى ما هحط راسى براسها
لان هى امه
والزوجة الغبيه اللى تقف قدام حماتها وتعلن العداء ليها
كأنها بالظبط
تعلن العداء على جوزها
المهم
انا جبت هدية شيك وقررت ان اروح
بما ان امى رافضة تماما الفكرة
لانى بمجرد ما قلتلها
انى هروح لحماتى
رفضت رفض قاطع
ولما قلتلها انى نشرت الموضوع على المدونة
وكنت بقرأ لها
اى تعليق يؤيد انى اروح
كانت تثور وتقول دة كلام فارغ
فطلبت من ابى ابو العقل الكبيرواللى واقف انى اروح
انه هو اللى يقولها
وقولتله انى هروح وانتوا مسافرين
لان والدى ووالدتى كانوا مسافرين عند خالت امى
اللى هى فى مقام امها
عشان عيد الام
ولكن
قررت انى اقولها انا بدل ما تزعل منى اكتر
واللى حصل انها زعلت بالفعل
وسافرت امى
واليكم ما حدث بالتفصيل:
اخدت هدية لوالدة ولعمة زوجى لانها ست كبيرة وطيبة اوى
وذهبت على اختة اولا
لانها ساكنه بالقرب من حماتى
ولكن لاقيتها عند حماتى
دخلت
وجلست على اقرب كرسى لباب الشارع
جابت حاجة ساقعة
شربتها وحلفت انى اتعشى عندها
ولكن انا رافضت
رفض قاطع وكفاية اوى انى شربت الحاجة الساقعة
ونزلت عمته
لانها ساكنة فوق والدته
وبتقولى مش تزعلى
رفضت انى اتكلم فى الموضوع
ولاحتى عتاب
وقعدت نصف ساعة بالظبط وروحت
وصمموا ان اخو جوزى الصغير يوصلنى للبيت
ووصلنى
وانتهى الموقف مع حماتى على هذا
وبدأت معاناتى مع امى
زعل غير طبيعى وشكوى لكل الناس
وسمعتوا المثل اللى بيقول
"العجل لما بيقع تكتر سكاكينة"
كل واحد ربنا قدرة على خير عمله
اللى قالت :
ازاى تفرط فى كرامتها
والاولى انها كانت تعاملك كويس
زى ما بتعامل حماتها
واللى قالت:
مادام هى فرطت فى كرامتها سيبك منها
وسيبيها تقرر حياتها زى ما هى عايزة
واللى ثار وعملها حدوتة
ومفيش حد قال كلمه حلوة
حتى بابا
انكر انه وافق
وقال ان جوزى لئيم لما قال
لو عايزة تروحى روحى
الله يسامحهم كلهم حتى ابى
غلطت لما رضيت جوزى وشوفت فى عينه الفرحة بيا
والرضا عنى
كنتى عايزة منى اية يا امى
اعامل جوزى وامة وحش
انا فرطت فى كرامتى فعلا
انا مش هروح عند حماتى تانى
انا عملت الواجب والاصول اللى هى معرفتهاش
انا لما كنت مخطوبة قبل كدة
وسبت خطيبى
بسبب
المشاكل اللى كانت والدته بتعملها
واساسا
لانى مكنتش بحبه
تعرفوا قالتلى ايه
هو ليه متمسكش بيكى
عشان كنتى بتعمليه وحش
الكلام دة جرحنى اوىىىىىىىىىى
فوق ما تتخيلوا
امى لحد دلوقتى يا سادة
بتقول فى وشى انها لسة بتحب خطيبى الاولانى
زى ابنها
مع ان ابنها دة غلط فى بنتها
ووراها ايام فظيعة
انا بس اللى مكنتش بحكى
انا تعبت من الكلام
تعبانة اوىىىىىىىىىىى
هل انا غلطت لما رحت؟؟؟؟؟؟؟
هل انا فرطت فى كرامتى واستاهل اللى هيعملوه فيا
بعد كدة؟؟؟؟؟؟؟
تعبانة اوىىىىىىىىى
مرسلة بواسطة أم فريده في 1:37:00 ص 65 التعليقات
الخميس، 19 مارس 2009
أمى........ سامحينى
ساعات بحس أنك امى
وأن مفيش فى الوجود زيك
وأن حضنك بالدنيا
وساعات ببعد بلاد عنك
وحتى وانا جنبك مش عارفة تحسى بيا
او احس بيكى
سامحينى يا أمى
أن كنت جرحتك يوم
ما أنا مش ملاك على الأرض
أنا بغلط و أثور وأقسى عليكى
ولأنك أمى بطلب منك كتيييييييييير
وانسى أنك بشر له طاقة وبيتعب
طماعة
أيوة انا طماعة خدت منك شبابك
ولسه عايزة تانى اكتر
ليه فى وسط الزحمة وأنانيتى
بنسى أن ليكى حق عليا
ليه لما بزعل منك
بحسبك جوايا حساب الملاكين
وأنا ماليش حق فى حسابك
ولما بغلط انا وتحسبينى
بزعل اوىىىى ليه
زى ما تكونى غلطى فى البخارى
مالى
فرحانة بنفسى اوى كده ليه
وناسيه ان اى نجاح بوصله
هى السبب فيه ،هى اللى بتدعيلى
مالى فرحانة
انى بعرف اتكلم وناسيه ان هى اللى علمتنى الكلام
أمى سامحينى
سمحى غباوتى وقلة حيلتى
وقسوتى عليكى بجهل منى
أمى سامحينى
دايما بنسى أن زعلك عليا هيكون أكبر من زعلى على نفسى
أمى سامحينى
نسيت انك بشر وان الكمال لله وحده
أمى سامحينى
لما بغضب اوى واثور وأعتبرك ضيعتى حقى لما
بنمشى مشوار ونرجع بخسارة ليا
امى سامحينى
نسيت أن خسارتك هتكون أكبر من خسارتى
لأنى انا تعب السنين
سنينك انتى
نفسى لما اجى ابكى زعلانة منك
عقلى
يرفضنى
ويقولى على قد زعلك هى زعلانه الف مرة
يا رب
لو غضبان عليا سامحنى
انا مهما رحت ولا جيت
عبد ضعيف لا ليا حيلة ولا وجود الا بأمرك
اجعل مودة بينى وبين امى وارضيها عنى
وعلمنى كيف ارضيها
دموعى لا تكفى اى كلمات سماح
بس عايزة اقولك
بحبك يا امى
وما املك الا انى ادعيلك وعمرى ما هديكى حقك
عليا
تسلم العين اللى حبتوتسلم الايد اللى ربت ويسلم القلب اللى سمى
مرسلة بواسطة أم فريده في 10:17:00 م 27 التعليقات
الأربعاء، 18 مارس 2009
وعكة صحية
مرسلة بواسطة أم فريده في 1:51:00 ص 23 التعليقات
الأربعاء، 11 مارس 2009
عنيدة ولكن ...بطريقتى
فات
وقال انى مش عنيدة
هو اية معنى العناد عندكم؟
انا عنيدة وافتخر ومصممة على دة
العناد عندى اسلوب حياة مش مشاكل ولا تصميم على راى وخلاص
انا بعاند لما بصمم اوصل للى انا عايزاة
انا كنت مع حماتى عنيدة جداااااااا
لأبعد ما تتخيلوا
عارفين ازاى
لما مش اديتها فرصة ولا مرة انها تمسك عليا غلطة
ودة كان عناد
انا عنادى عناد ايجابى مش سلبى
انى اكون عنيدة عشان احقق احلامى
عادى
اللى مش عادى انى اقف اتفرج على احلامى بتضيع منى
الطيبة مش عيب
بس مش بحب اتظاهر بحاجة مش فيه
انا ممكن اكون شريرة اوى لما كنت بسكت
والتزم الصمت فى حاجات كتير كانت بتحصل
يعنى........
اصلى الصراحة مش كنت عايزة ابقى غلطانة
وانا لسانى ساعات بيبقى عايز قطعة
فقررت السكوت
فأنا عنيدة
مع اى حد يحاول يقهرنى
عنيدة
مع حلم عايزة اوصله اجرى لأخر المشوار واوصله
عنيدة
مع الدنيا والزمن وغصب عنه هيفضل عدل معايا
عنيدة
مع الظروف الصعبة ومش هنكسر بسهولة
عنيدة
حتى فى هدوئى بيكون اصله عناد
عنيدة
لما بفرح اوى بكون انتصرت على حاجة
عنيدة
لما صممت انى ادخل الثانوى العام
عنيدة
لما بدلت حلمى بأنى اكون مهندسة
لأنى اكون صحفية
عنيدة
لما فقدت حلم الصحافة بسبب ناسه
وبدلتة تانى بالتدريس
عنيدة
لما رحت قدمت ورقى لاول مرة فى مدرستين
للعمل وقبلت فيهم الاتنين مع بعض
وانا اللى كنت بختار
عنيدة
لما تعبت اوى فى اول شغلى لحد ما وصلت لاحسن مدرسة فى الدور اللى كنت فية
عنيدة وعنادى دة ميزة مش عيب اهرب منه
بأخد الحلو فى الصفة وابعد عن السلب
انا عنادى ايجابى وبستفيد منه
وللزوجة العنيدة جدا بقية
مرسلة بواسطة أم فريده في 2:55:00 ص 75 التعليقات
الاثنين، 2 مارس 2009
من أمنك لم تخونة.............لو كنت خاين

مش عارفة أبدأ منين
أو حتى أقول أية ...................
الكلام بيهرب منى بس لازم اقول
حماتى
أنا هحكى علاقتى بيها من أول ما أتجوزت
لاء
قبل الجواز كمان
أنا كانت علاقتى بيها عادية فى البداية
يعنى انا مش كنت بحب أقول كلام مش حاساه ودة
اللى قلتة لجوزى قبل الجواز
انى حتى مش هقولها يا ماما زى ما هو بيقول لولدتى الا
لما احس انى عايزة اقولها
وبالفعل مش عدى وقت طويل وعملت فيا موقفين عجبونى منها
فقررت أنى أقولها "يا ماما"
الصراحة انا كمان زى ما أكون بتلكك
عشان كنت عايزة أرضى جوزى لانه كان بيعامل أمى حلو أوى
وعشان أنا كنت بحبه حبيت أهلة كلهم وقررت أنى أكرمهم
وكانوا الموقفين
الموقف الأول :
قبل الجواز أتصلت بيا فى يوم تفكرنى بعيد ميلاد جوزى
عشان ابقى اقولة
"كل سنة وهو طيب"
مع العلم انه كان ساعتها مش فى مصر
كان خارج مصر نظرا لظروف شغلة فى بلد عربى
فعجبنى منها أنها عملت كدة يعنى على أعتبار أنه محبة منها
الموقف التانى :
أنا عدى عليا وأنا مخطوبة عيدين منهم عيد كان جوزى لسة مش رجع من السفر
لاقيتها جاية تزورنا فى العيد الصغير وبتدينى عيدية
مع أن الموقف دة شئ طبيعى والمفروض أنة لو محصلش يبقى دة هو اللى مش طبيعى
على سبيل أن دى عادات وتقاليد
بس أنا بشوفها مش أساسى ومش ليها لازمة
عادى يعنى
وأعتبرت أن دى محبة منها برضة
ودى كانت المواقف اللى دارت ما بينا قبل الجواز بس
وعلى أساس الموقفين دول قلتلها
"يا ماما"
عشان خاطر جوزى
وبعديها رجع جوزى من السفر وأتجوزنا والحمد لله
وبعد الجواز
عدت مدة قصيرة والوضع هادى ولا شئ غير طبيعى
ولكن دائما
تأتى الرياح بما لا تشتهى السفن
بدأت بداية مش بطالة
وكنا انا وجوزى فى زيارة عندهم
ونظرا لظروف شغل جوزى خارج مصر يعنى فترة وهيسافر
كنا بنروح ونقعد يومين
مع أنى مش بحب أبات عند حد
لكن
كلة يهون عشان خاطرة
وكنت بساعدها وهى بتطبخ
ومرة وانا بغسل الاطباق لاقيت 50جنية فرحت اديتهالها لان
شكلها مطبق زى ما يكون محدش واخد بالة منها
فقالتلى دى مش عارفة مين من
قريبها اعطها ليا
المهم
كنا ساعات نسهر أنا وجوزى وأختة وأخوة نتفرج على
التليفزيون
وطبيعى مش هنصحى بدرى
بس عشان مش أبقى قليلة الذوق
كنت بقوم الساعة يعنى 11أو 12
حتى لو نيمين الصبح
عشان أساعدها فى الأكل او فى عمايل البيت
لأن بنتها بتشتغل
وميبقاش شكلى وحش
وبرضة عشان خاطر جوزى
تخيلوا ...........تخيلوا!!!!!
كنت بتكلم معاها دردشة عادية
لاقيتها بتقولى أية
انتى بتصحى متأخر
على اعتبار أنى المفروض أنى اصحى من الفجر
مش كفاية أنى بصحى قبل جوزى وهو طبعا مش بيقوم قبل الساعة3 العصر
ولا كان المفروض اسيبة سهران لوحدة وأقولة
لا يا حبيبي أنا هقوم أنام عشان عندى غسيل وطبيخ الصبح
وطبعا كالعادة
كان لازم أمسك أعصابى
وقولتيلها
انا بقوم بدرى لما بيكون ورايا حاجة
وبينى وبينكم سكت
ومشينا بعدها روحنا ومش قلت لجوزى حاجة
وفى يوم
لأقيت حماتى بتعدى عليا فى البيت بتقولى تعالى معايا للدكتور
عشان ضهرها واجعها وعايزة تروح لدكتور العظام
جوزى مش كان فى البيت
راح يحلق شعرة
قلتلها ومالة مفيش مشكلة أجى معاكى
كلمتة على الموبيل
وقلتلة أنى هروح معاها
طبعا وافق
ورحت معاها وكانت نفسى راضية
وربنا يعلم انا عملت الواجب معاها وزيادة
وهى كانت كمان كريمة معايا وعزمتنى واحنا ماشيين
على حاجة ساقعة
وانا صممت انى ادفعلها التاكسى وفلوس الكشف
وصممت انها تديهالى لكن انا رفضت
ولما روحنا قالت لجوزى وكان عايز يدينى الفوس
وانا قلتلة انا أية وأنت أية أحنا واحد
ودى أمى
وطبعا كانت خروجه حلوة
وقلت الكلام دة لجوزى وشكرت كتييييييييير فيها وكان كلامى من القلب
وربنا يعلم
بعدها
لآقيتها بتقولى أنى أروح عندها عشان ............
امسح معاها الشقة
عروسة لسة مش عدى عليها شهر تروح تمسح لحماتها الشقة
وهى عندها
بنتين واحدة أنسة والتانية متجوزة
طب لو مش قادرة زوقيا تجيب واحدة تمسحلها
انا عند ماما كنا ساعات بنعمل كدة
المهم
كان الكلام قدام جوزى
لآقتنى بقولها حاضر
وهو قالها بكل بساطة :خليها بعد ما أسافر
سكت
ماهو انا كان لازم اسكت على الأقل قدامها
وعديت اليوم كلة
وتانى يوم
كلمتةوقلتلة:انى المفروض مش كانت قالت كدة
وانى حتى لو عايزة تطلب منى كانت على الاقل كانت استنت شوية
دا انا لسة عروسة
تصورو قالى أية!!!!!
أنت مش كنت بتروحى عندها وتقعدى
وهى مش قصدها حاجة هى تقصد انك تعمليها انتى وهى وأختى
وقلب الطرابيزة وحسسنى انى انا الوحشة
والآكتر
لأقيت والدتة بتتصل بينا تقولى مش تعملى أكل بكرة
أنا هجيب أكل
وطبعا كان بارع جدا فى انه يحسسنى بالذنب ولانى بحبة وأوى كمان
أعتذرت
للاسف
وحسيت انى غلطانة وأنا كمان اللى صالحتة
وعدى الموقف
لكن التقيل هو اللى جاى ورا
ودة المهم اوى
أخر يومين لجوزى فى مصر قرر اننا نروح نقعد يومين عند والدتة
ويسافر من هناك
وافقت على عينى ارضاءا لية
وحضرتلة الشنطة ووالدتة قعدت تعمله أكل كتييييير
يعنى عشان هو هناك مفيش حد يعملة اكل
وبابا وماما جاؤا عشان يوصلوه المطار ويأخدونى
اقعد عندهم لحد
ما ان شاء الله يبعتلى واروحله
الست كانت كريمة وعملت غداء
اتغدينا أناوماما وبابا وجوزى
وبعد كدة
وصلت جوزى المطار
ورحت عند امى
وكان يوم صعب اوى اوى عليا
وتانى يوم فكرت انى اتصل بيها اتطمن عليها
لانها اكيد تعبانة زيى
من فراق ابنها
لاء اكيد اكتر منى
وعديت يوم وكلمتها التانى
وعديت يوم تانى وكلمتها التالت
يعنى تقريبا يوم ويوم
فى تالت مكالمة ابنها قالى نايمة
ومتهيألى كان المفروض انها لما تصحى تكلمنى
دة مش حصل وماما قالتلى استنى لما هى تتصل بيكى
وانا مش كنت مقتنعة ابدا
ومصممة انى اكلمها
وفجأة
لاقيت ماما غيرت رأيها وبتتصل بيها
وبعد ما كلمتها
حماتى طلبت تكلمنى
لاقيت الكارثة
لاقيتها بتقولى
ان كان فى 500 جنية فى مكان فى الصالون
وبعد ما مشيت انا وجوزى
بتبص عليها
مش لاقيت الا 200
والمفروض انى انا اللى روقت الاوضة وكنستها الصبح
فى اليوم دة
والاكتر
قالتلى لما كنت بتتغدوا فى السفرة
كانوا موجودين
والد جوزى شافهم
وبعد ما مشينا مش لاقيا الا200
دى عمرها ما حصلت
وانا قلتهلها وفكرتها
انى لما لاقيت فلوس قبل كدة اديتهالها
وانى اكيد لو شفتهم هقولك
واديهوملك
وقالتلى اخيرا
انا هروح لعراف
(جهل بقى بعيد عنكوا)
قلتلها براحتك
وقفلت السماعة
وانا منهارة اية اللى عملته دة
ازاى....ازاى...ازى
وحكيت لأمى
انهارت امى وكلمت جوزى وهى متضايقة جدا
المشكلة ان أمى كانت قاعدة جنبى
يعنى مش ينفع اخبى
بس الصراحة
موقف جوزى عجبنى اوى
كلمها ومش انكرت اى كلمة
بس قالت انا مش اتهمتها خالص
وطلب منهم يتصلوا بينا ويعتذروا لولدى اللى كان
هو كمان مش طايقهم
وطبعا
لا اتصلوا ولا عبرونا
خالص
وانا بقى مش عملت اى حاجة كالعادة
سكت وسكت وسكت
ومش عارفة لحد امتى انا هفضل ساكته
وعلى فكرة
انا مش هادية
أنا بس عصابيتى مدمرة وغير عقلانية
فمن فترة طويلة كنت بحاول اعمل عليها كنترول
والحمد لله قدرت
بس دة مش يمنع انها موجودة
بس مستخبية
قولولى انتم لو كنتم فى مكانى هتعملوا اية
واكيد طبعا
مفيش شك انى مأخدتش الفلوس دى
لان
انا ولله الحمد بنت ناس اوى
ومتربية تريبة دينية ولله الحمد سليمة
دا المفروض حتى
"من أمنك لم تخونة ولو كنت خاين"
اعمل اية مع حماتى
اللى بتعز المشاكل زى عينيها
دى بنتها قبل جوزى ما يسافر كانت مش بتكلمها
وقالتلى بكرة يجى الدور عليكى
دا العادى منها
وانا اتضايقت منها وقلت ازاى بنت تقول كدة على امها
ولكن الدور جة بدرى
اوى
ماذا تفعل لو كنت مكانى ؟
اول حياتى مع جوزى وداخل علينا عيد الام
وكان المفروض انى اروحلها واجيب لها
هدية
انا قررت انى مش هدخل بيتها
ابدا
ابدا
ووالدى حلف ان عمرة ما هيدخل بيتهم
وحماتى شايفة اننا كبرنا الموضوع
مشكلتى وعايزة فيها رايكو والحل
واحنا فعلا اللى كبرنا الموضوع
ولا هو اللى كبير اوىىىىىىىىىى
اه يا حيرتى مع حماتى مش قلت حماتى حياتى
الله يسامحها
مرسلة بواسطة أم فريده في 1:05:00 م 97 التعليقات
السبت، 28 فبراير 2009
خلص الاسبوع الاول
وبدأت أول مشكلة بعد الاسبوع الأول
"الخروج"
قصدى ماقبل الخروج
وقصيدة ممنوع...ممنوع...........
المرة دى ممنوع المكياج منعا باتا
قلت يا بت معلش جوزك بقى وبيغير عليكى ولا يهمك
ومش متضايقة خالص
بس بينى وبينكم أنا كنت ساعات كتير بستعبط وأحط
حاجات خفيفة
بس على مين كان بيفقسنى بسرعة ويمسك المنديل ويمسح وشى
ويقولى :أية دة؟
بس مش دى المشكلة خالص
المشكلة أنه بيلبس بسرعة تلاتين ألف طقم فى الثانية
ألبس بسرعة أنا أزاى حد يقولى
لاء والأكتر ممكن بعد ما ألبس
يقولى:ضيق غيرية
وماله هغيرية بس بلاش عصبيه وطنطيط
يا بنى بلاش انا أصلا عصبية متخلنيش أطلعهم عليك
يلا عيش أيامك
المهم
الموقف اللى غاظنى اوىىىىىىىىىىىىىى
بس معرفش أذا كنت غلطانة فية ولا لاء
قولولى رأيكوا أنتم
فى يوم
قالى:هنخرج بعد الغدا
قلتلة:يا ريت
قمت جهزت طقم شيك أوى وكويت الطرحة عشان لأقيتها مكرمشة
شوية
وكويت قميص لية كمان
وحضرت الغد واتغدينا
وبعد الاكل
قلت أنا هقوم ألبس قبلة عشان مش يحصل مشاكل
بعد شوية
التليفون رن
طلعت أختة بتقولة أنا جاية شوية قالها أحنا خارجين
قلت وأنا مالى هو اللى قال فسكت
قمت أكمل لبس وبعد ما أنا لبست وخلصت
قالى :أية دة دا ضيق غيرية
قلت لنفسى:يا بت أهدى خالص غيرية كان هو تقريبا لبس
(هتقولولى لية لبستيه من الاول لما عارفة انه ضيق
هقولكم انى اول مرة البسة من بعد ما اشتريتة والظاهر وزنى زاد شوية)
ورحت جبت طقم تانى بس الطرحة برضة عايزة تتكوى
ورايحة أكويها وأنا متغاظة
قالى :أية دة أنتى لسة هتكوى طيب مش هنخرج
وقفت قدامة مزبهلة
ولا كلمة ولا نفس ولا حركة
مصدومة من وقع الموقف
وبالفعل غير هدومة وخرج من الأوضة قعد فى اوضة الانترية
بعد ما خلصت حالة الازبهلال اللى انا كنت فيها
غيرت هدومى وقعدت شوية فى الاوضة
أفكر هعمل اية
لاقيتة داخل عليا مبتسم عادى خالص
ولا كأنه عمل حاجة
وبيقولى :أنا كلمت أختى تيجى وقلتلها أننا مش هنخرج
وزى ما أكون فازة فى البيت
لاهو قالى أنه هيكلمها
ولا حتى سألنى
قلتله مش المفروض أنك قبل ما تكلمها تقولى انا الاول
انا مش كنت معترضة على انها تيجى
لكن بعد الموقف دة كنت فى حالة نفسية مش تسمح انى اضايف اى حد
بس انا فهمت هو عمل كدة عشان مش يدينى اى فرصة انى اتكلم فى اللى حصل
ودة بالضبط اللى حصل
اهو دة من المواقف اللى انا مش كنت عارفة اعمل اية فيها يا ترى
انا غلطانة
ولا لاء
انا كان ممكن ارد واتخانق واقولة ازاى وممكن كمان
ارفض اقابل اختة لأنى زعلانة
بس وبعدين هتكون أية النتيجة...ما أنا لازم برضة افكر فى العواقب
كانت فكرة بالنسبالى مرفوضة
وبفكر أنا كنت غلطانة لما عديت وسكت
ولا كان المفروض أخد موقف
ولا انا غلطانة من البداية
وبالنسبة للمشكلة بتاعت انه مش بيساعدنى
لاقيتلها حل
بقيت اريح دماغى ومش اقولة اعمل حاجة انا بس اسيب الحاجة قدامة
وهو يقوم يعملها لوحدة
بس المهم انى مش اقولة يعملها
لأنى مجرد انى اطلب مش يحصل خالص
واخيرا
دى مش مشاكل انا عارفة
الحمد لله انا لسة بعيدة عن المشاكل مع زوجى
انا من الاساس بكتبت بتسلسل احداث عشان اوصل للبوست اللى جاى
دة رايكوا مهم عندى فية اوى
عشان كدة انا هنزل دة واكتب التانى بعدية بفترة قصيرة
مرسلة بواسطة أم فريده في 4:51:00 ص 49 التعليقات