CLICK HERE FOR BLOGGER TEMPLATES AND MYSPACE LAYOUTS »

السبت، 28 فبراير 2009

خلص الاسبوع الاول


صدر قرار من محمكة حماتى الدولية أننا ممكن نخرج
عادى يعنى

وبدأت أول مشكلة بعد الاسبوع الأول

"الخروج"
قصدى ماقبل الخروج
وقصيدة ممنوع...ممنوع...........

المرة دى ممنوع المكياج منعا باتا
قلت يا بت معلش جوزك بقى وبيغير عليكى ولا يهمك
ومش متضايقة خالص

بس بينى وبينكم أنا كنت ساعات كتير بستعبط وأحط
حاجات خفيفة

بس على مين كان بيفقسنى بسرعة ويمسك المنديل ويمسح وشى
ويقولى :أية دة؟

بس مش دى المشكلة خالص

المشكلة أنه بيلبس بسرعة تلاتين ألف طقم فى الثانية
ألبس بسرعة أنا أزاى حد يقولى

لاء والأكتر ممكن بعد ما ألبس
يقولى:ضيق غيرية

وماله هغيرية بس بلاش عصبيه وطنطيط
يا بنى بلاش انا أصلا عصبية متخلنيش أطلعهم عليك
يلا عيش أيامك

المهم

الموقف اللى غاظنى اوىىىىىىىىىىىىىى
بس معرفش أذا كنت غلطانة فية ولا لاء
قولولى رأيكوا أنتم

فى يوم

قالى:هنخرج بعد الغدا

قلتلة:يا ريت

قمت جهزت طقم شيك أوى وكويت الطرحة عشان لأقيتها مكرمشة
شوية
وكويت قميص لية كمان

وحضرت الغد واتغدينا

وبعد الاكل

قلت أنا هقوم ألبس قبلة عشان مش يحصل مشاكل

بعد شوية

التليفون رن

طلعت أختة بتقولة أنا جاية شوية قالها أحنا خارجين

قلت وأنا مالى هو اللى قال فسكت

قمت أكمل لبس وبعد ما أنا لبست وخلصت

قالى :أية دة دا ضيق غيرية
قلت لنفسى:يا بت أهدى خالص غيرية كان هو تقريبا لبس

(هتقولولى لية لبستيه من الاول لما عارفة انه ضيق
هقولكم انى اول مرة البسة من بعد ما اشتريتة والظاهر وزنى زاد شوية)

ورحت جبت طقم تانى بس الطرحة برضة عايزة تتكوى
ورايحة أكويها وأنا متغاظة

قالى :أية دة أنتى لسة هتكوى طيب مش هنخرج

وقفت قدامة مزبهلة
ولا كلمة ولا نفس ولا حركة
مصدومة من وقع الموقف

وبالفعل غير هدومة وخرج من الأوضة قعد فى اوضة الانترية

بعد ما خلصت حالة الازبهلال اللى انا كنت فيها
غيرت هدومى وقعدت شوية فى الاوضة
أفكر هعمل اية

لاقيتة داخل عليا مبتسم عادى خالص
ولا كأنه عمل حاجة


وبيقولى :أنا كلمت أختى تيجى وقلتلها أننا مش هنخرج

وزى ما أكون فازة فى البيت
لاهو قالى أنه هيكلمها
ولا حتى سألنى

قلتله مش المفروض أنك قبل ما تكلمها تقولى انا الاول
انا مش كنت معترضة على انها تيجى
لكن بعد الموقف دة كنت فى حالة نفسية مش تسمح انى اضايف اى حد

بس انا فهمت هو عمل كدة عشان مش يدينى اى فرصة انى اتكلم فى اللى حصل
ودة بالضبط اللى حصل

اهو دة من المواقف اللى انا مش كنت عارفة اعمل اية فيها يا ترى
انا غلطانة
ولا لاء

انا كان ممكن ارد واتخانق واقولة ازاى وممكن كمان
ارفض اقابل اختة لأنى زعلانة


بس وبعدين هتكون أية النتيجة...ما أنا لازم برضة افكر فى العواقب
كانت فكرة بالنسبالى مرفوضة

وبفكر أنا كنت غلطانة لما عديت وسكت
ولا كان المفروض أخد موقف
ولا انا غلطانة من البداية


وبالنسبة للمشكلة بتاعت انه مش بيساعدنى
لاقيتلها حل

بقيت اريح دماغى ومش اقولة اعمل حاجة انا بس اسيب الحاجة قدامة
وهو يقوم يعملها لوحدة
بس المهم انى مش اقولة يعملها
لأنى مجرد انى اطلب مش يحصل خالص

واخيرا


دى مش مشاكل انا عارفة
الحمد لله انا لسة بعيدة عن المشاكل مع زوجى
انا من الاساس بكتبت بتسلسل احداث عشان اوصل للبوست اللى جاى
دة رايكوا مهم عندى فية اوى
عشان كدة انا هنزل دة واكتب التانى بعدية بفترة قصيرة


الاثنين، 23 فبراير 2009

كاك.....كاك...... كاك





مين فينا اللى هيكاكى أنتى ولا أنا

هى حرب من فينا هيحط الخطة والتانى يمشى علية
مش مهم مين اللى يكاكى المهم يعرف يكاكى


طول النهار كأنة بيصرخ ويقول : أنا سى السيد يا أمينة
ممنوع ممنوع ممنوع...................

اى شئ ممنوع أعملة من غير ما أقول لسى السيد
ماشى يا سيدى موافقين
بس الاكتر من كدة
أنه ممنوع أنه يساعدنى فى أى حاجة
هتقولولى زى أية؟
مثلا طبعا العروسة أول اسبوع الاكل بيجى لحد عندها
مش بتعمله
بس على الأقل أنا بحضر الأكل وأغسل الأطباق
فيها أية قولولى ولو هو عمل الشاى بعد الأكل بالذات
لو هو اللى غاوى الشاى مش أنا
لاء ; كرامة سى السيد مش تسمح
ازاى اطلب منه يجيبلى مية
لاء; كرامة سى السيد مش تسمح
ياسلام بقى لو حبيت أقولة كلمتين حلوين عشان يعملى حاجة
يقولى: أيوة غنى عليا غنى

طب اعمل اية ؟
(بس دة حبيبي برضة)
أستحملى يابت مش مهم
يوم السبوع وما أدراك مايوم السبوع
المفروض أن العروسة تتطبخ
الصراحة
مش أنا اللى طبخت(ربنا يخلى مامتى وأختى حبيبتى) بس أنا اللى غسلت الاطباق والحلل
وأنا عمالة أغسل بعد الضيوف ما مشيوا
(أصلى بحب النظافة)
لأقيتة جاى يقولى أعمليلى شاى
قلت يابت مش مهم أعمليله الشاى
(دة برضة حبيبك)
وبعد ما عملت الشاى بقولة خدة معاك لحد ما أخلص
مرضيش
شوفتوا بقى

بس أنا أتضيقت أوى قلت طب والله مش هوديلة الشاى
الأ لما أخلص الأطباق
بعد شوية رجع أخد الشاى معرفش لية
يمكن ندم
أيوة شكلة حس أنه زعلنى
المهم
قعدنا وشربنا الشاى بعد شوية كان عطشان
فقام يجيب ميه
قلتلة هات مية معاك
بس ومخلصتش

مش قمتى جبتى المية انتى لية وكلام كتيييييييييييييييير

اعمل أيه أيييييييييييييييييه؟
حد يقولى
والبقية تاتى......................................

الجمعة، 20 فبراير 2009

وأخيرا أتجوزت



على رأى الست أمينة "أخيرا أتجوزت"
(أكيد مش أمينة وسى السيد)
وبقى عندى زوج وعائلة زوج وحماة قصدى حماتى

ما حماتى حياتى
ولا أية رأيكوا
المهم
أنا عروسة بعد شهر ونص من جوازى قررت أنى أغير معالم
مدونتى
اللى أنا كنت فتحاها بس عشان أكتبت كلمات بسيطة تعبر عن
مشاعرى تجاة خطيبى وهو الأن اصبح
زوجى
(عقبال كل البنات)
وعايزة أخد فيها رأى اللى أتجوزوا قبلى واللى لسة متجوزوش
يا يقولوا رأيهم يأما يستفيدوا من اللى هقولة
اصل اللى هقولة كتيرررررررررررر
جدا
بس المرة دى هكتفى بالتعارف وبس
المرة الجاية
هحكى أول حكاية
والباقية تأتى....................