وبدأت أول مشكلة بعد الاسبوع الأول
"الخروج"
قصدى ماقبل الخروج
وقصيدة ممنوع...ممنوع...........
المرة دى ممنوع المكياج منعا باتا
قلت يا بت معلش جوزك بقى وبيغير عليكى ولا يهمك
ومش متضايقة خالص
بس بينى وبينكم أنا كنت ساعات كتير بستعبط وأحط
حاجات خفيفة
بس على مين كان بيفقسنى بسرعة ويمسك المنديل ويمسح وشى
ويقولى :أية دة؟
بس مش دى المشكلة خالص
المشكلة أنه بيلبس بسرعة تلاتين ألف طقم فى الثانية
ألبس بسرعة أنا أزاى حد يقولى
لاء والأكتر ممكن بعد ما ألبس
يقولى:ضيق غيرية
وماله هغيرية بس بلاش عصبيه وطنطيط
يا بنى بلاش انا أصلا عصبية متخلنيش أطلعهم عليك
يلا عيش أيامك
المهم
الموقف اللى غاظنى اوىىىىىىىىىىىىىى
بس معرفش أذا كنت غلطانة فية ولا لاء
قولولى رأيكوا أنتم
فى يوم
قالى:هنخرج بعد الغدا
قلتلة:يا ريت
قمت جهزت طقم شيك أوى وكويت الطرحة عشان لأقيتها مكرمشة
شوية
وكويت قميص لية كمان
وحضرت الغد واتغدينا
وبعد الاكل
قلت أنا هقوم ألبس قبلة عشان مش يحصل مشاكل
بعد شوية
التليفون رن
طلعت أختة بتقولة أنا جاية شوية قالها أحنا خارجين
قلت وأنا مالى هو اللى قال فسكت
قمت أكمل لبس وبعد ما أنا لبست وخلصت
قالى :أية دة دا ضيق غيرية
قلت لنفسى:يا بت أهدى خالص غيرية كان هو تقريبا لبس
(هتقولولى لية لبستيه من الاول لما عارفة انه ضيق
هقولكم انى اول مرة البسة من بعد ما اشتريتة والظاهر وزنى زاد شوية)
ورحت جبت طقم تانى بس الطرحة برضة عايزة تتكوى
ورايحة أكويها وأنا متغاظة
قالى :أية دة أنتى لسة هتكوى طيب مش هنخرج
وقفت قدامة مزبهلة
ولا كلمة ولا نفس ولا حركة
مصدومة من وقع الموقف
وبالفعل غير هدومة وخرج من الأوضة قعد فى اوضة الانترية
بعد ما خلصت حالة الازبهلال اللى انا كنت فيها
غيرت هدومى وقعدت شوية فى الاوضة
أفكر هعمل اية
لاقيتة داخل عليا مبتسم عادى خالص
ولا كأنه عمل حاجة
وبيقولى :أنا كلمت أختى تيجى وقلتلها أننا مش هنخرج
وزى ما أكون فازة فى البيت
لاهو قالى أنه هيكلمها
ولا حتى سألنى
قلتله مش المفروض أنك قبل ما تكلمها تقولى انا الاول
انا مش كنت معترضة على انها تيجى
لكن بعد الموقف دة كنت فى حالة نفسية مش تسمح انى اضايف اى حد
بس انا فهمت هو عمل كدة عشان مش يدينى اى فرصة انى اتكلم فى اللى حصل
ودة بالضبط اللى حصل
اهو دة من المواقف اللى انا مش كنت عارفة اعمل اية فيها يا ترى
انا غلطانة
ولا لاء
انا كان ممكن ارد واتخانق واقولة ازاى وممكن كمان
ارفض اقابل اختة لأنى زعلانة
بس وبعدين هتكون أية النتيجة...ما أنا لازم برضة افكر فى العواقب
كانت فكرة بالنسبالى مرفوضة
وبفكر أنا كنت غلطانة لما عديت وسكت
ولا كان المفروض أخد موقف
ولا انا غلطانة من البداية
وبالنسبة للمشكلة بتاعت انه مش بيساعدنى
لاقيتلها حل
بقيت اريح دماغى ومش اقولة اعمل حاجة انا بس اسيب الحاجة قدامة
وهو يقوم يعملها لوحدة
بس المهم انى مش اقولة يعملها
لأنى مجرد انى اطلب مش يحصل خالص
واخيرا
دى مش مشاكل انا عارفة
الحمد لله انا لسة بعيدة عن المشاكل مع زوجى
انا من الاساس بكتبت بتسلسل احداث عشان اوصل للبوست اللى جاى
دة رايكوا مهم عندى فية اوى
عشان كدة انا هنزل دة واكتب التانى بعدية بفترة قصيرة
49 التعليقات:
ربنا يهنيكم ياجميله
وزى مالاقيتى حل للمشكله الاولى هتلاقى حل للمشكله دى
عموما ده اختلاف طباع ودى اول سنه جواز يعنى لازم هتنصدموا بطباع بعض
لان بعد الجواز بيكون الطرفين على طبيعتهم مفيش مجاملات ولا اى حاجه من دى
ربنا يسعدك وتفهموا بعض بسرعه ياقمر
بس انتى ممكن بعد الموقف ما يخلص وتمتصى غضبه تناقشيه
السلام عليكم
عارفة هو انتى كنتى ممكن من الاول وانتى بتلبسى لقيتى ان اللبس ضيق غيرتى في ساعتها
أما موضوع اخته بيتهيالى كان عادى انه يكلمها عشان هى اخته وهو جايبهابيته
مش عارفة انتى اتضايقتى عشان كده ماخدتيش فرصة انك تتناقشى او تاخدى موقف
احسن لان ده كان ممكن يؤدى لخناقة او خصام
وهو ممكن يكون حب ان ده ميحصلش
على العموم ده راى وممكن نختلف
المهم من ده كله اننا منتظرة الباقي اسلوبك حلو وسلس
ودى اول زيارة وان شاء الله هتتكلالا كتير
تحياتى ليكى
اولا عين العقل انك ماقلبتيش الموضوع خناقة لامك كنت هتخسرى كتير ومش هتكسبى حاجةوفى الاخر هتطلعى انت الغلطانة
ثانيا بجد انتو لازم تتفقوا سوا ان يبئا فيه تواصل وحوار بينكو
ماهو ماينفعش يكون كل كلامه معاك على طريقة : افعل ولا تفعل
التفاهم والمناقشة بتكون جميلة وبتريح الطرفين
وفى الاخر ربنا يوفقك ويسعدكو سوا ويرزقكو الزرية الصالحة ان شاء الله
أنا يمكن قلت دي غيرة لما قلك ديق غيريه لكن لما قال مش خارجين دي حرقة دم بأه بصراحة مفهمتش هو بيعمل كده ليه بس الموضوع فيه إن غالبا هو عاوز يعمل من الاول أفندي عشان متتمرجحيش عليه أقصد عشان متتنكيش عليه في رجاله كده يقلك ايه أعلمها من الاول بس دي طريقة مش صح حاولي تتنناقشي معاه وتفهميه
ربنا يسعدك ويوفقك ويريح قلبك يارب
مودتي
بصى يا حبيبتى انا فكرت كتير فى الموضوع ولاقيت انه حاجه تفرس اوى
وخصوصا ان شكله كان بيتلكك
ولو فى مكانك كان زمانى زعقت واخانقت معاه عشان مش بحب الاستهبال
وكنت هلاقى انى ماطلعتش بحاجه وهو هيزيد عناد واقول يارتنى ماكنت عملت كده
عشان كده بقى هقولك لو كانت الحكايه دى حصلت امبارح وانتى لسه ماعملتيش زيى كده
يبقى روحيله وكلميه براحه ... قوليله انت ضحكت عليا امبارح وضيعتلى الخروجه
وكده ليا عندك خروجه على مزاجى بقى
وكلميه بهدوء كده واشترى منه
وربنا يهديه يارب
بصى ياجميل دى اول زيارة ليا هنا
وان شاء الله مش هتكون الاخيرة لانى قررت اتابعك
بلنسبة للبس
الراجل بيبقا شايف اللى احنا مش عارفينو
المهم عيزاكى فى الحتة دى تبقى ذكية
وتعملى ايه بقه
لما يقولك كدة
قوليلى خلاص يا حبيبى ولا تزعل نفسك هعملك اللى انتا عايزو
وبدال اللبس ده مش عجبك هغيرو
كدة انتى هتكسريه
واحتمال كبير يقولك خلاص يا حبيبتى البسى اللى عايزاه
بس بلاش الضيق مثلا
حسسيه انك مبسوطة من غيرتو عليكى
هما بيحبو الاحساس ده اوى
وخليكى اذكا منو وعدى الموقف
لما يقولك مش خارجين قوليلو وايه يعنى اقعد معاك فى البيت احسن
وغيرى الموضوع واقلبيه لصالحك
اديني بحجز وحرجع اقرا
الغيره مطلوبه برضه بينكم يعنى هو هيلاقى ملكه فين يغير عليها تانى
اكيد انتى اللى فى قلبه علشان كده اسمعىكلامه
وممكن بلطفك ورقتك معاه تقنعيه انك تلبسى اللى انتى عاوزاه
السلام عليكم
ازيك يا قمراية:
بصى انا شايفة انك مش غلطانة فى حكاية اللبس لانك مكنتيش عارفة ان وزنك زاد شوية والطقم بقى ضيق عليكى.. اما حكاية الميكب فدى كنتم المفروض اتكلمتم فيها قبل الجواز أصلاً.. ولو بيضايقه الميكب ابقى حطى كحل وبس الكحل بيخلى البنت امورة حتى من غير اى مكياج زيادات..
أما عن التلكيكة اللى حصلت عشان متخرجوش فدى طبعاً لانه حس انه متضايق لانه كبس أخته وقالها انكم خارجين فحس بتأنيب ضمير فإتلكك على اى حاجة عشان يصالح اخته وخلاص.. هو باين عليه عنيد شوية معلش خديه بالسياسة يا بنتى :)
مش عارف بس هو فيه تفسير للعمله ساعة المشكلة بتاعة الخروج بس ربنا يهدي النفوس بقا تقريبا لقى شكلها وحش لم اخته قالتله انها جاية و لقى شكلها وحش لما رفض وقالها انكوا خارجين بس قعد يفكر قال بقا يلا اي حجة يقعدك بيها طبعا انتي ادتيله الفرصة بالطقم الضيق الي كنتي لابساها فحصل خير و كله خير.
و اشرتي في مقالك لحاجة بس تقريبا مخدتيش بالك منها و هي وزنك نصيحة من راجل كده اوعي تضربي بعد الجواز حافظي على وزنك لحد اما توصلي لل50 سنة ساعتها ممكن تسيبي نفسك وربنا يديكي طولت العمر وده عشان ميعرفش يبص بره صدقيني خلي بالك من جسمك كويس جدا بس من لالواضح انه بيحبك جدا عشالن كده بيغير عليكي من الهوا ربنا يسعدكم مع بعض وخلي بالك من ملابسك و جسمك عشان دولت زينة المراة
دمتي بخير وسعادة
تعرفى نفس ازمة الناس اللى مجوزين واعرفهم مش عارفة ليه المشاكل متشابه دايما ااقولك حاجة موضوع المكياج واللبس هوا اكيد بيحبك علشان كده بيغير عليكى ودى حاجة تبسطتك وتفرحك مش تتضايق خالص وحاولى فيها مش تتضايقى منه اما بخصوص خلافات انه مش بياخد رايك دى لازم تقوليله من الاول انها بضايقك جدا علشان مش يستمر فيها عندى اختى بتعانى من موضوع ان جوزها مش بياخد رايها لانها عودته على كده انه يعمل هوا كل حاجة
ربنا يسعدك دايما يارب
بصى هو اول شئ عنده حق طبعا فى الميكاب واللبس الضيق وده الشئ يحمد عليه ..
وبالنسبة لموقفك كده تمام جدا ..
وياريت تفضلى على كده ..
بلاش اى انفعال لان الزوج بيضايق من انفعالات زوجته ..
وخاصة اهله ثم اهله ثم اهله دايما لازم تبين له ان اهله فوق راسك من فوق ووان البيت مفتوح لهم فى اى وقت ..
ولما يجوا تحضرىكيكة وحاجات حلوة ويحس باهتمامك ناحيتهم ..
ولو كانت زيارتهم حلوة بعد ما يمشوا تقعدى تقوليله اد ايه كانت زيارتهم جميلة ..
ولو نكدوا عليكى فيها وممكن دى تحصل جدا ما تعليقش..
اولا هايحبك اكتر لما يلاقيك حبه اهله ..
وتانى شئ لما انتى تسكتى هو اللى هايجبلك اى حاجة زعلتك منهم ..
وبالنسبة للخروج قولى له انا مش هازعل بس ما تقوليش اننا خرجينا واهيأ نفسى للخروج وما نخرجش علشان بزعل من جوايا ..
هاتلاقيه نازلك تانى يوم وفسحة جميلة جدا ..
يارب اكون فدتك وانا والله بكلمك من واقع شخصى ومش من خيال ..
دمتِ بخير الحبيبة زوجة ..
مممممممم
انا بصراحه مش عاوزاكى تاخدى اى موقف من الحاجات اللي زى بالعصبيه
كويس اووى ع فكرة سكوتك وانك عديتى الموقف
متهيالي انك برده تبدائي تخلي بالك من الحاجات اللي ممكن ياخدها تلكيكه
زى اللبس الضيق بلاش منه خالص
والبسي اللي عاوزاه وبرده بلاش من المكياج
متهيالي دى حاجات لو استغنتى عنها مش هتفرق كتير معاكى
بس هتفرحه هو وتسعده
وموضوع الخروجه ده
ممكن يكون عمل كده لانه ااتحرج مثلا من اخته
اكمنهااتصلت وقالهالأ احنا خارجين
فممكن يكون راجع نفسه ولقى انه يرحب باخته طبعا خصوصا انكم لسه ف اول الجواز
والضيوف بتهل عليكم كتير
فتلاقيه مضايق من نفسه فطلع ده بتلكيكه عليكى
ع العموم الموقف عادى وعديه لان مافيهوش حاجه جامده اوووى
ده رايي لو كنت مكانك كنت هحاول اعمل كده
وربنا يكرمكم يارب
ربنا يسامحك يا زوجه يا عنيده
قلبتى عليا المواجع والعند
المشكله لا فى الميكب
ولا فى اللبس الضيق
ولا فى المشوار إللى إضرب بمبه
المشكله فى الإستفزاز ... وإنك بتحسى فجأه بعد الزواج إنك إضحك عليكى
وبتلاقى نفسك بقيتى فجأه مواطنه من الدرجه التانيه...مش هقول التالته
علشان مكبرش الموضوع
مقدرش أقلك الصح بالضبط لأنى أنا شخصيا
زوجه عنيده جدا جدا بس سياسيه ودبلوماسيه جدا جدا
من الصنف بتاع أصون كرامتى من قبل حبى
أهم حاجه متخليش حد يهينك ويبعتر كرامتك .. ويحولك لشغاله بس من غير مرتب
غير كده كله بيعدى
بالنسبه لموضوع الغيره ده علشان تلاقيكى حلوه شويتين أصل الراجل مبيغرش على مراته إلا لما تكون عجباه
قوى..ومتأكد إن الرجاله هيبصولها
متقلقيش كلها سنه وعيل ومش هيغير خالص
تحياتى ..إسلوبك سهل وشيق وجذاب متابعاكى يا إللى منك لله
السلام عليكم
احساسى بيكى انك عاقلة الى مالا نهاية
وكمان زوجة مطيعة
وبدة هتنولى رضا ربك
وانا متأكدة انك قابلتى اختة بكل ترحاب وقد يكون هذا أخجلة من زاتة بدرجةاكثر بكثير مما لو كنت أخذتى موقف وقت زيارة اختة الذى كان قد يثير مشاكل كبيرة
ولكن الان وقد هدىء الامر بعض الشىء
وجب عليك ان تفتحى بابا للنقاش معة لكى تعربى لة عن استيائك لما فعلة معك
وتأخذى منة عهدا باللا يكرر ذلك الموقف ثانيا
لأن الحياة ليست هو فقط بل انتم سويا
اعانك اللة ووفقك
بتقولى انك عصبية بس بجد مش باين
بتتصرفى كويس و طول ما قادرة تستوعبى المواقف ده ربنا هيكرمك ان شاء الله
وبلاش تلبسى ضيق تانى :P
امي
حبيبتي
ست الستات
انا ست عندي علل كتيرة
ومش معلقه غير على نقطة واحده لأن الباقي عاجبك مهما انكرتي "بصي في عيني.. الراجل عاجبك يا ماما وهو بيتحكم .. اياك تنكري .. اجيب ليكي البيه الضابط على طول"
النقطة هي اخته
هي دي مربط الحمار .. اوعي اوعي اوعي اي خلاف بينك وبينه يتحول خلاف مع اهله
اولا ده مش عدل ولا عقل
ثانيا اللي متكسبش اهل جوزها بكره متلاقيش كلمة طيبة عنها في غيابها وودنه لا تسمع الا مذمتها "خطر"
ثالثا مين الراجل ابن الاصل اللي يسمح ان مراته تعادي اهله المقربين؟ "خطر كبيييييييير"
وعلى رأي شعبولا .. بس خلاص
بصي انا شايفه ان الموضوع في اوله وبسيط يعني حاولي تهدي نفسك من جوة وضايفي اختة كويس وحسسية انك مبسوطة وبليل ويوم كويس قوليلة بطريقه حلوة انة كان ممكن تخرجوا ولو حتي تروحوا لاختة مش لازم مكان برا او انكوا تخرجوا تاني يوم تروحوا لاختة لانها جتلكم وتقولية كويس انك اتصلت بيها تيجي عشان متزعلش انك قلتلها خارجين
معرفش راي صح ولالا بس لازم تحسسية ان اهلة زي اهللك بظبط مش عارفه بئا اصلي لسة متجوزتش ومعنديش خبرة المهم ان دية مواضيع بسيطة وبلاش تستنفذي الخناق في حاجات صغيرة عشان ميبقاش في ملل وزهق وربنا يكرمك يارب
والله كويس انك عديتيها.. معرفش لو مكانك كنت عملت ايه لاني سريعة الاشتعااااااااااااال
بس برضو كان لازم بعد ما تمشي تتكلمي في الحصل ده .. واصلا اصلا كان المفروض من قبل الجواز تتفقوا على ان مافيش زيارات الا لما تكونوا متفقين على كده
الا بقى لو زيارة مفاجأة
ربنا يهنيكي ويستر عليك
عاشقة الرومانسية
ربنا يسمع منك
والله انا بحبك جوزى وهو بيحبنى
بس لازم الفلفل والشطة
تحياتى
بنوتة
اولا اهلا بيكى نورتينى
وحاول اردلك الزيارة فى اقرب وقت
اه فعلا انا اتضيقت للسبب دة
وانا بحاول انى اكون هادية على قد ما اقدر
وميبقاش فى اى مشاكل
انا خوفت اغيرة بعد ما لبست يحصل اللى حصل بس هعمل اية تحياتى
نورتينى واتمنى دوام الزيارة
ليلي فى عالم ادم
بحاول اكون محتوية المواقف واتكلم معه
بس انا مش عايزة اعمل صدام من اولة
خصوصا انه ايام وكان هيسافر
وقلت لسة العمر قدامى طويل
وهنتكلم براحتنا
نورتينى واتمنى دوام الزيارة
كاتب مصرى
انا حسيت كدة برضة عشان كدة سألت هو بيعنل كدة لية
ولولا انى متاكدة انة بيحبنى
انا كنت قلت انه عايز ينكد عليا وخلاص
تحياتى
bondoka
لاء الحكاية دى حصلت بعد جوازنا بأسبوعين
يعنى من زمان والباب اتقفل فيها بس انا بحاول افهم منكم اية وجهة نظرة
بس مش فتحت الموضوع تانى عدى وخلاص
تحياتى
البنت المشمشية
انا عملت كدة ورحت غيرت على طول
هو اللى كان بتلكك
ربنا يهدينا ويهدية
تحياتى واتمنى اشوك دايما منورانى
romansy
انا كمان ببقى مبسوطة لما بغير عليا وبحب كدة اوى
ودة اهتمام منة
بس الموقف كلة ضايقنى
اتمنى دوام الزيارة
أنا كمان عملت كدة أول ما تجوزت
بس بصراحة كنت عاوز اخرج قعدت تلبس في ساعتين وتتمكيج كمان ساعتين
وأنا خلقي ضيق غيرت ونمت
ولسة بعد 13 سنة فاكراهالي
ذكريات
دلوقت انتي شايفاها وحشة بعد وقت هتلاقيها لذيذة
وبعدين لزوم التأطيم يا باشمهندسة
ما يكونش عامل حاجة لكن ليكي مزاج تعكنني علية تجتري من القديم
وكلة مصلحة
تحياتي
كل واحد من الزكجين كان عايش لنفسة بس
مش كدة وبس لا دة فية ناس عايشة علشانة الاب والام والاخوة الاصغر
اما اتجوزتوا لازم كلواحد فيكوا يعيش للتاني في الاول ما ينفعش ما حدش عايز يتنازل مع الوقت والعشرة _بكسر العين_
كل واحد بيعرف دورة ويحفظة وتمشي المركب
barbie girl
وعليكم السلام
الحمد لله انا بخير يا رب تكونى بخير
لاء انا مش وصلى المعنى دة خالص بس انا استغربت لما قالها احنا نازلين بالذات هى اقرب اخواته ليه
وانا بحبها احنا علاقتنا كويسة والحمد لله مع بعض
اه هو فعلا عنيد والغريب انه بيتهمنى ان انا اللى عنيدة
وبحاول اكون سياسية معاة
تحياتى
amr ta3lab
هو تقريبا دة كان التفسير الوحيد ليها اللى كلكوا اجمعتوا علية
بس انا مش كنت واخدة بالى منه خالص
وبالنسبة للزيادة انا نزلتها تانى بعد ما سافر
لان انا عارفة كدة كويس والحمد لله انا بحب اهتم بنفسى مش بس عشان جوزى عشان صحتى كمان
واشكرك على النصيحة
تحياتى
ايوشة
دا طبيعى ماما قالتى قبل الجواز ان فى اختلافات لازم تحصل فى السنة الاولى وبأذن الله السنة الاولى تعدى وبتهدى الامور
وخاصة لما ربنا يكرمنا ونجيب اول طفل
بس حكاية انه مش ياخد رايي فى حاجة دا مستحيل مستحيل
انا اساسا عندى شخصية ودى اللى تعبانى والمشكلة الاكبر عندى روح القيادة
يعنى انى سايباه يأخد وقته بس
ويسعدك انتى كمان
تحياتى
لجين ابو الدهب
ايوة انا عارفة انه عندة حق
وصدقينى لو مش كان عمل كدة كنت هزعل انا مش مغلطاة
اشكرك لتأيدى
والله انا بعمل كدة ومش بجيب سيرتهم بأى شر
حتى لما والدته غلطت فى حقى مش رديت عليها
وهقول البوست اللى جاى هى عملت اية
وربنا يعلم انا من يوم خطوبتى له لايوم غلط فيهم ولا قلتلة كلمة وحشة عليهم
وكنت بقولة كلام حلو بس مش عارفة دة نصيب ولا ابتلاء من ربنا
وعايزاكى تفدينى فى اللى جاى
لأنه اهم
تحياتى ليكى
semsema28
انا بالفعل استغنيت عن كل دة وعمرى ما لبست ضيق انا اساسا بحب الجوال وبيريحنى فى الخروج
لانى مش بحب اكون ملفتة فى الشارع
وفعلا واضح هو دة السبب الحقيقي انه اتلكك عشان خاطر اختة
ولانها كمان اقرب اخواته لية
انا كمان عملت كدة وعديتها وبقول الحمد لله انى مع جوزى مشفتش حاجة منك صعبة
وانا لو سفت بلاوى الناس لازم احمد ربنا على اللى انا فيه
وربنا يكرمك انتى كمان
تحياتى
سلام عليكم يا اهل الدار
انا اول مره اجي هنا
اتكعبلت في مدونتك عند ستيته يا لولو
شوفي يا ستى انا رايي انك كنتى لازم ما تعديش الموقف ده ابدا
بالنسبه للبس الضيق انا ما شوفتوش هل هو ضيق فعلا ولا هو بيتلكك عشان احكم
لكن اكيد انتى عارفه
وطبعا فى ظل الموضه الحاليه بتاعة اللبس الى لازق فى جتت البنات فى الشارع انا عندي ميل انى اصدقه
المهم
بالنسبه بقى لموضوع اخته
لا تقبلي هذا الوضع ابدااااااا ليييييه
لان المره الجايه هايجيبلك خمس افراد على الغدا فجأه ويقولك وايييييه يعنى هو انا ما اعرفش احكم على بيتى
اصل الرجاله دول داخل البيت بيكونوا افراد لا مسؤوله
انا مره جوزي دبسني فى غدا لعشرين فرد على غفلللللللله
اه والله العظيم حصل وغدا امته الساعه 7 مساءا
هو كان يومها مظلوم
بس برضه كان المفروض ينبهني ان ده ممكن يحصل لانه ما قاليش انه معاه الشعب كله
ام هند
لازما حتما باتا يعرف ان اي ضيف يطلب منه انه يجى او انتى تروحيلهم يكون عندك خبر وعااااادي لما يقولهم ثواني اسأل ان كان فى ارتباطات تانيه
لان ببساطه ممكن تكوني انتى تعبانه مش فاضيه جايلك ضيفه اي حاجه
لانك مش شوال بطاطا فى هذا البيت
وان كان جوزك من النوع بتاع اصل بيتى
قوليله طيب يا عم الامور بيتك بقى قابلهم وضيفهم لواحدك انا عندي صداع
انا ما باحبش الضيوف يدفعوا تمن المشاكل عشان اهله ما يكرهوكيش انما على الاقل تلوحي له بالموقف ده
ان كان ده بيتك لواحدك يبقى اتفضل قابل الضيوف لواحد
لكن على اعتبار انه عمل كده لاول مره كان يكفى كلمتين فى العضم
وبالنسبه لموضوع اللبس هو لازم يتعود ويحفظ ان الستات مش هايشدوا القميص والبنطلون فى دقيقه ويخرجوا
امال لما يكون عندك عيلين ثلاثه وبتلبسيهم كمان قبل الخروج ؟؟؟؟؟؟؟
ابقى جهزي لبس دايما عندك مكوي
وبعد كده هاتبخي الهدوم وتنتريها وتلبسيها كده تتفرد عليكى ههههههههههههههههههههههه
تحياتي لكى بس خلى بالك انتى دلوقتي بتضعى ناااااموس حياتك
وجوزك على ما تعوديه يا اختي
ايمان
ايوة انا زيك كدة
اصون كرامتى من قبل حبى بس مش عايزة حد يشمت فيا ويقول عاملة مشاكل مع جوزها من اول شهر
وانتى عارفة اللى بتكلموا كتيييييييير
لا بعون الله مش هيحصل انى اكون شغالة
دا انا بقى كدة هكون من الدرجة التالتة مش التانية
ربنا يخليكى انا مش حلوة اوى بس بعتز بنفسى عندى شوية جمال برضة
وانا عارفة انه والحمد لله بيحبنى
ماما قالتلى كدة برضة انه لما اجيب اطفال هيبطل يغير
ومش هتفرق معاه رحت ولا جيت المهم هما فى ايدى
انا كمان من غير مجاملة بحب اقرالك جدا
تحياتى
ريكو
وعليكم السلام
ربنا يخليكى ويسمع منك انا بحاول اكون مطيعة
انا فعلا عملت كدة
والصراحة انا مش اتكلمت خالص لانى كنت متأكدة انه كان هيطلعنى غلطانة وقلت
اخلى النقاش والجدال لحاجة كبيرة
وربنا ما يجيب حاجة كبيرة
وبلس هدومى قبل ما يفكر انه حتى يلبس عشان لو فى حاجة اغيرها
وبأخد رايه كمان فيها عشان اريح نفسى
اعانك الله
تحياتى
funckydoctor
لا انا عصبية بالفعل بس منفترة طويلة بحاول اعمل كنترول على عصبيتى
بس انا كنت خايفة انه من كتر الضغط على اعصابي ارجع تانى
انا مش بحب الضيق بس التيير هو اللى ضاق من كتر القاعدة
لانى كانت حركتى كتير وفجاءة اجازة وقلة حركة
اتمنى دوام الزيارة
تحياتى
ستيتة
روح قلبى
يا ربى انتى لحقتى فهمتينى
انا فعلا بحب جوزى ومش هو المشلك خالص وكلة بيتحل
انا زى ماقلت فى اخر البوست ان كل اللى فات تسلسل احداث ومقدمات
للكارثة اللى جاية
وتبقى قوليلى اعمل اية
مستياكى
بس اقري البوست بتمعن وفضيلى نفسك خالص واقرى حتة حتة وردى وفدينى
سلام يا حبيبتى
حروف دلو مرة تانية وجرح سابقا
عقبال ما اشوفك فى الكوشة
بس يارب يكرمك بعريس يحبك اوى وتحبية
انا فعلا بحاول اعمل كدة واحسسة ان مفيش فرق بينا خالص
هو فعلا بسيط بس احيانا بحب افهم اية اللى حصل
وفعلا من تعليقاتكوا وصلت لمعنى مش كان واصلى خالص
تحياتى ليكى
واتمنى دوام الزيارة
فتا فيت
الحمد لله انك بخير
مش كان قدامى الا كدة هو حتى مش ادانى فرصة انى اتكلم معاة
ولما اليوم عدى قلت اعدى الحكاية بالمرة
وربنا يهنيكى انتى كمان
تحياتى
مصرى جدا
يا ربى كل الرجالة شبه بعض
انا جوز بنت عمى قالى نفس الكلام
هما انتوا بتحبوا تعكننوا عليا الله يسامحكوا
وهى دى حاجات تتنسى لازم نقتكرها
وعلى فكرة انت عندك حق بس لما يكون حد بيتنازل علطول غلط
المفروض مرة هو ومرة انا
شكرا لزيارتك واتمنى دوام الزيارة
تحياتى
مررررررحبا اول شي ربنا يخليكو لبعض اللهم امين
تاني شي بالعكس انتي مش غلطانه انتي سكتي ومشيتي الموقف وعدتيعا
هو ممكن كان خايف من ردة فعلك وعارف انك معصبه عشان هيك طلب من اختو تيجي عشان انتي تتلبخي وتنسي موضوع الخرجه ومتزعليش وتكلضمي
بس انتي لم عملتي هيك هو اكيدعارف انك مشيتيها بمزاجك وانتي عايزة تمشيها وهو اكيد شايلهالك في قلبو واكيد بما انك بتحاولي تحمي بيتك من الخناق هو عارف كدة وبحبك اوي عشان انتي بتمشي حاجات هي من حقك بس انتي بتمشيها عشانو
تحيـــــــاتي
انتي بتدلعي ياقمر
هههههههههههههههههههههههه
الراجل ماغلطش
والمفروض انتي لما لاقيتي اللبس ضيق كنتي غيرتي من غير مايقولك
وبعدين تزعلي لو كنتي انتي اللي لابسه وخلاكي تقعدي علشان اخته
ده بالعكس هو اللي كان لابس وغير وقعد
والمفروض من الاساس ودي غلطته ان اخته قالتله جايه طالما ماخرجش من البيت ومش مشوار ضروري كنتوا رحبتوا ولغيتوا الخروج
هو انا بفكر عكس الناس ولا ايه
هههههههههههههههههههههه
دوام الزيارة مين دة انا جاي ومعايا عزالي هعسكر هنا
بجد بقا
تعرفي مين الركن الاساسي في الحياة الاسرية؟
الزوجة
لية
الراجل ما ينفعش
الست الحنان والحب والتضحية والرحمة
هيا كدة
الراجل العكس تمام بمنتهى الصراحة
علشان كدة سيدنا محمد قال امك ثم امك ثم امك وبعدين ابوك لان الاست هي عمود البيت من غيرة ينهار
الاف البوت بدون راجل مات او لزق في جزمة(طفش مع واحدة يعني) ولا مشاكل انما لو العكس كل سنة وانتي طيبة البيت خرب
العيال ضاعت والراجل انحرف (تقوليش كان عدل)
ربنا يخليكوا لينا ونعذبكم كمان وكمان
وتستحملونا كمان وكمان
نظرية العسل والطحينة
احنا العسل طبعا
صبرنى يا رب
يا اهلا ياهلا يا تلمتيت مرحبا
اية النور دة اللى هل علينا
زيارة اختة كانت حبة بعد الغدا يعنى بليل هجيب حاجة ساقعة وخلاص
بس انا نبهته ان المفروضكان يقولى قبل ما يروح ويتصل بيها
ودة لازم جدا عشان انا اللى هقابلها وهضايفها مش هو
والراجل كان غلبان وقالى ماشى
والله اعلم يمكن بيسكتنى
انا بحب احط هدومى كلها مكوبة على الشماعة
بس الطرح حتى لما بكويها مجرد ما اطبقها او اعلقها بتتكسر برضة فبكويها قبل الخروج ودى مش بتاخد وقت
لا وحكاية الغدا هو عارف انها عشان اعمل اكل لازم يقولى من قبلها لانه هيتحمل النتائج
وهنزلة غصب واقتدار عشان يشترى الطلبات لدة
يأما يقولى من قبلها وانا اتصرف واقول لماما تجيبلى وهى جاية وبتيجى تساعدنى
وبالنسبة للضيوف
ماما قالتلى نصيحة عمرى
قالت:لو حتى فى مصيبة بينك وبين جوزك وجالك ضيف اوعى يعرف ان فى اي حاجة او تقابلية وحش لانه مالوش ذب فى اللى انتوا فية
وبالنسبة للوقت اللى بأخدوا فى اللبس
دة لو عملى كدة بعد ما اجيب اطفال هقولة يا تلبس العيال انت يا اما تقعد تتفرج عليا وتسكت
ونورتينى ويا هلا يهلا بيكى دايما:)
عاشقة القمر
اولا اهلا بيكى
واتمنى انه يكون حس بكدة وعرف غلطتة
يعرف انى عديتها عشان بحبة ويقدر دة وربنا يستر
واتمنى دوام الزيارة
عاشقة وغلبانة
اة بدلع
يا بنتى انا مش كتبت فى اخر البوست ان دى مش مشاكل
وانا كنت بكتب تعارف بينى وبنكم بس
المهم اللى جاى التقيل ورا
وعلى فكرة انا كنت غيرت بالفعل وكان فاضل الطرحة بس وهو دة اللى غاضنى
وانا استعجبت انه قالها كدة بس انا مش بحب اتدخل بينه وبين اهلة بكتفى بالفرجة
لانك مهما عملتى مش هتعجبى
تحياتى
مصرى جدا
يا سلام بيت ومطرحك
بس معلش انا مش بستقبل رجالة فى غياب جوزى لما يرجع تنور
هههههههههههههههه
المهم كلة اللى انت قلتة انا فهماة كويس وعارفاه
بس على فكرة زى ما الست اساس البيت
البيت مش هيكون ناجح من غير صاحب البيت
ولازم يكون فى مساعدة لبعض وحب ما بينهم
ولما انتوا عارفين دة بتعذبونا لية احنا ناقصين عذاب
تحياتى:)
انا مش عارف الرجاله جرالهم ايه اليومين دول
ههههههههههههه
لا موقف جميل منك و انتي مش غلطانه خالص
هو تلاقيه بيدلع عليكي شويه :D
إرسال تعليق