مش عارفة أبدأ منين
أو حتى أقول أية ...................
الكلام بيهرب منى بس لازم اقول
حماتى
أنا هحكى علاقتى بيها من أول ما أتجوزت
لاء
قبل الجواز كمان
أنا كانت علاقتى بيها عادية فى البداية
يعنى انا مش كنت بحب أقول كلام مش حاساه ودة
اللى قلتة لجوزى قبل الجواز
انى حتى مش هقولها يا ماما زى ما هو بيقول لولدتى الا
لما احس انى عايزة اقولها
وبالفعل مش عدى وقت طويل وعملت فيا موقفين عجبونى منها
فقررت أنى أقولها "يا ماما"
الصراحة انا كمان زى ما أكون بتلكك
عشان كنت عايزة أرضى جوزى لانه كان بيعامل أمى حلو أوى
وعشان أنا كنت بحبه حبيت أهلة كلهم وقررت أنى أكرمهم
وكانوا الموقفين
الموقف الأول :
قبل الجواز أتصلت بيا فى يوم تفكرنى بعيد ميلاد جوزى
عشان ابقى اقولة
"كل سنة وهو طيب"
مع العلم انه كان ساعتها مش فى مصر
كان خارج مصر نظرا لظروف شغلة فى بلد عربى
فعجبنى منها أنها عملت كدة يعنى على أعتبار أنه محبة منها
الموقف التانى :
أنا عدى عليا وأنا مخطوبة عيدين منهم عيد كان جوزى لسة مش رجع من السفر
لاقيتها جاية تزورنا فى العيد الصغير وبتدينى عيدية
مع أن الموقف دة شئ طبيعى والمفروض أنة لو محصلش يبقى دة هو اللى مش طبيعى
على سبيل أن دى عادات وتقاليد
بس أنا بشوفها مش أساسى ومش ليها لازمة
عادى يعنى
وأعتبرت أن دى محبة منها برضة
ودى كانت المواقف اللى دارت ما بينا قبل الجواز بس
وعلى أساس الموقفين دول قلتلها
"يا ماما"
عشان خاطر جوزى
وبعديها رجع جوزى من السفر وأتجوزنا والحمد لله
وبعد الجواز
عدت مدة قصيرة والوضع هادى ولا شئ غير طبيعى
ولكن دائما
تأتى الرياح بما لا تشتهى السفن
بدأت بداية مش بطالة
وكنا انا وجوزى فى زيارة عندهم
ونظرا لظروف شغل جوزى خارج مصر يعنى فترة وهيسافر
كنا بنروح ونقعد يومين
مع أنى مش بحب أبات عند حد
لكن
كلة يهون عشان خاطرة
وكنت بساعدها وهى بتطبخ
ومرة وانا بغسل الاطباق لاقيت 50جنية فرحت اديتهالها لان
شكلها مطبق زى ما يكون محدش واخد بالة منها
فقالتلى دى مش عارفة مين من
قريبها اعطها ليا
المهم
كنا ساعات نسهر أنا وجوزى وأختة وأخوة نتفرج على
التليفزيون
وطبيعى مش هنصحى بدرى
بس عشان مش أبقى قليلة الذوق
كنت بقوم الساعة يعنى 11أو 12
حتى لو نيمين الصبح
عشان أساعدها فى الأكل او فى عمايل البيت
لأن بنتها بتشتغل
وميبقاش شكلى وحش
وبرضة عشان خاطر جوزى
تخيلوا ...........تخيلوا!!!!!
كنت بتكلم معاها دردشة عادية
لاقيتها بتقولى أية
انتى بتصحى متأخر
على اعتبار أنى المفروض أنى اصحى من الفجر
مش كفاية أنى بصحى قبل جوزى وهو طبعا مش بيقوم قبل الساعة3 العصر
ولا كان المفروض اسيبة سهران لوحدة وأقولة
لا يا حبيبي أنا هقوم أنام عشان عندى غسيل وطبيخ الصبح
وطبعا كالعادة
كان لازم أمسك أعصابى
وقولتيلها
انا بقوم بدرى لما بيكون ورايا حاجة
وبينى وبينكم سكت
ومشينا بعدها روحنا ومش قلت لجوزى حاجة
وفى يوم
لأقيت حماتى بتعدى عليا فى البيت بتقولى تعالى معايا للدكتور
عشان ضهرها واجعها وعايزة تروح لدكتور العظام
جوزى مش كان فى البيت
راح يحلق شعرة
قلتلها ومالة مفيش مشكلة أجى معاكى
كلمتة على الموبيل
وقلتلة أنى هروح معاها
طبعا وافق
ورحت معاها وكانت نفسى راضية
وربنا يعلم انا عملت الواجب معاها وزيادة
وهى كانت كمان كريمة معايا وعزمتنى واحنا ماشيين
على حاجة ساقعة
وانا صممت انى ادفعلها التاكسى وفلوس الكشف
وصممت انها تديهالى لكن انا رفضت
ولما روحنا قالت لجوزى وكان عايز يدينى الفوس
وانا قلتلة انا أية وأنت أية أحنا واحد
ودى أمى
وطبعا كانت خروجه حلوة
وقلت الكلام دة لجوزى وشكرت كتييييييييير فيها وكان كلامى من القلب
وربنا يعلم
بعدها
لآقيتها بتقولى أنى أروح عندها عشان ............
امسح معاها الشقة
عروسة لسة مش عدى عليها شهر تروح تمسح لحماتها الشقة
وهى عندها
بنتين واحدة أنسة والتانية متجوزة
طب لو مش قادرة زوقيا تجيب واحدة تمسحلها
انا عند ماما كنا ساعات بنعمل كدة
المهم
كان الكلام قدام جوزى
لآقتنى بقولها حاضر
وهو قالها بكل بساطة :خليها بعد ما أسافر
سكت
ماهو انا كان لازم اسكت على الأقل قدامها
وعديت اليوم كلة
وتانى يوم
كلمتةوقلتلة:انى المفروض مش كانت قالت كدة
وانى حتى لو عايزة تطلب منى كانت على الاقل كانت استنت شوية
دا انا لسة عروسة
تصورو قالى أية!!!!!
أنت مش كنت بتروحى عندها وتقعدى
وهى مش قصدها حاجة هى تقصد انك تعمليها انتى وهى وأختى
وقلب الطرابيزة وحسسنى انى انا الوحشة
والآكتر
لأقيت والدتة بتتصل بينا تقولى مش تعملى أكل بكرة
أنا هجيب أكل
وطبعا كان بارع جدا فى انه يحسسنى بالذنب ولانى بحبة وأوى كمان
أعتذرت
للاسف
وحسيت انى غلطانة وأنا كمان اللى صالحتة
وعدى الموقف
لكن التقيل هو اللى جاى ورا
ودة المهم اوى
أخر يومين لجوزى فى مصر قرر اننا نروح نقعد يومين عند والدتة
ويسافر من هناك
وافقت على عينى ارضاءا لية
وحضرتلة الشنطة ووالدتة قعدت تعمله أكل كتييييير
يعنى عشان هو هناك مفيش حد يعملة اكل
وبابا وماما جاؤا عشان يوصلوه المطار ويأخدونى
اقعد عندهم لحد
ما ان شاء الله يبعتلى واروحله
الست كانت كريمة وعملت غداء
اتغدينا أناوماما وبابا وجوزى
وبعد كدة
وصلت جوزى المطار
ورحت عند امى
وكان يوم صعب اوى اوى عليا
وتانى يوم فكرت انى اتصل بيها اتطمن عليها
لانها اكيد تعبانة زيى
من فراق ابنها
لاء اكيد اكتر منى
وعديت يوم وكلمتها التانى
وعديت يوم تانى وكلمتها التالت
يعنى تقريبا يوم ويوم
فى تالت مكالمة ابنها قالى نايمة
ومتهيألى كان المفروض انها لما تصحى تكلمنى
دة مش حصل وماما قالتلى استنى لما هى تتصل بيكى
وانا مش كنت مقتنعة ابدا
ومصممة انى اكلمها
وفجأة
لاقيت ماما غيرت رأيها وبتتصل بيها
وبعد ما كلمتها
حماتى طلبت تكلمنى
لاقيت الكارثة
لاقيتها بتقولى
ان كان فى 500 جنية فى مكان فى الصالون
وبعد ما مشيت انا وجوزى
بتبص عليها
مش لاقيت الا 200
والمفروض انى انا اللى روقت الاوضة وكنستها الصبح
فى اليوم دة
والاكتر
قالتلى لما كنت بتتغدوا فى السفرة
كانوا موجودين
والد جوزى شافهم
وبعد ما مشينا مش لاقيا الا200
دى عمرها ما حصلت
وانا قلتهلها وفكرتها
انى لما لاقيت فلوس قبل كدة اديتهالها
وانى اكيد لو شفتهم هقولك
واديهوملك
وقالتلى اخيرا
انا هروح لعراف
(جهل بقى بعيد عنكوا)
قلتلها براحتك
وقفلت السماعة
وانا منهارة اية اللى عملته دة
ازاى....ازاى...ازى
وحكيت لأمى
انهارت امى وكلمت جوزى وهى متضايقة جدا
المشكلة ان أمى كانت قاعدة جنبى
يعنى مش ينفع اخبى
بس الصراحة
موقف جوزى عجبنى اوى
كلمها ومش انكرت اى كلمة
بس قالت انا مش اتهمتها خالص
وطلب منهم يتصلوا بينا ويعتذروا لولدى اللى كان
هو كمان مش طايقهم
وطبعا
لا اتصلوا ولا عبرونا
خالص
وانا بقى مش عملت اى حاجة كالعادة
سكت وسكت وسكت
ومش عارفة لحد امتى انا هفضل ساكته
وعلى فكرة
انا مش هادية
أنا بس عصابيتى مدمرة وغير عقلانية
فمن فترة طويلة كنت بحاول اعمل عليها كنترول
والحمد لله قدرت
بس دة مش يمنع انها موجودة
بس مستخبية
قولولى انتم لو كنتم فى مكانى هتعملوا اية
واكيد طبعا
مفيش شك انى مأخدتش الفلوس دى
لان
انا ولله الحمد بنت ناس اوى
ومتربية تريبة دينية ولله الحمد سليمة
دا المفروض حتى
"من أمنك لم تخونة ولو كنت خاين"
اعمل اية مع حماتى
اللى بتعز المشاكل زى عينيها
دى بنتها قبل جوزى ما يسافر كانت مش بتكلمها
وقالتلى بكرة يجى الدور عليكى
دا العادى منها
وانا اتضايقت منها وقلت ازاى بنت تقول كدة على امها
ولكن الدور جة بدرى
اوى
ماذا تفعل لو كنت مكانى ؟
اول حياتى مع جوزى وداخل علينا عيد الام
وكان المفروض انى اروحلها واجيب لها
هدية
انا قررت انى مش هدخل بيتها
ابدا
ابدا
ووالدى حلف ان عمرة ما هيدخل بيتهم
وحماتى شايفة اننا كبرنا الموضوع
مشكلتى وعايزة فيها رايكو والحل
واحنا فعلا اللى كبرنا الموضوع
ولا هو اللى كبير اوىىىىىىىىىى
اه يا حيرتى مع حماتى مش قلت حماتى حياتى
الله يسامحها
97 التعليقات:
القصة كارثية المظهر والمخبر يا قطة
المشكلة ان الست دي هي مفتاح سي السيد جوزك .. ولو حتى كانت امنا الغولة للأسف هي برضه مفتاحه
مونكن عادي جدا تكوني انتي وجوزك بتحبوا بعض حتى الثمالة وبعد الشر تطلقوا لو الموقف ده مكنش فيه حكمة وصبر وجدية وقرارات حاسمة لا تقبل النغيير
[قبل البدء خدي بالك ان ده رأيي وشخصيتي وانتي ادرى بظروفك وجواباتك.. انا مش بقومك على حد وبكره اصلا اني اخبت زوجة على زوجها .. لكن ده اللي انا شخصيا بعمله]
شوفي ياعنيده ياأوختشي
اولا اعمل لحماتي بيتها واكلها واشطف الأطباق ده سابع المستحيلات ان لم يكن ثامنهم كمان .. عندها بنات معندهاش بنات ده مش موضوعي ويتفلق اللي يزعل ويخبط راسه في اقرب حيط واللي في قلعه ينفضه
بس بالمقابل لما حد بيدخل بيتي استحاااااااااااااالة يقوم حتى يودي لي كباية لحد المطبخ
يعني قرايب زوجي او قرايبي معاملة واحده
انا في بيتهم اتخدم .. هم في بيتي يقعدوا ويتلموا .. مبحبش حد يلخبط لي مطبخي
اول زواجي اخوات زوجي زعلوا مني بشده وبأمص لأني رفضت يساعدوني في الغدا او غسل الاطباق او الشاي .. وانتي كده بتعتبرينا غرب وده بيت اخونا
رديت انا شوفوا انا بيت امي مابشيلش فيه كوباية حتى يومنا هذا .. بروح لها ياعنيده بعد الشغل بتعمل لي الفطار والشاي وتجيب لي المية
ياجماعة مبعرفش اخدم حد في بيته .. فادوني فرصة اجاملكم في بيتي "واخده بالك بيتي مش بيت اخوهم بروح امهم"
الدرس الأول لا بيات ولا خدمة الا في بيتك وها تتخانقي شويتين ثم ها تتصالحي ومش ها يعرف يجيب اخرك في الموضوع "والحمد لله جت منها سهلة ومتيسرة" .. انا وعيالي نزور طوب الأرض لكن النوم بيتي
طيب يا عنيده طظ فيكي ها ابات عند ماما لوحدي
وماله يا حبي طظين فيك وانا في بيتك ياغالي ولما ترجع ها تلاقيني مكان ما حطتني بالضبط ان شا الله بعد شهر
يوم والتاني وها تلاقي الدنيا مشيت
جوزي يحب يبات في كفر البطيخ تبعه
وانا صعب عليا قوي بعد ما خلفت انام في كفر الدبان والناموس .. بصحى الصبح الاقي ورقة عسل على المرايه "انا رايح لماما واخواتي وها ابات ياقمر" ارد انا بموبيل صباحو قشطة يا معلمي وسلم لي كتير السلام على اهل كفر البطيخ نفر نفر
يرجع وهو فريش وانا كمان ارتحت من الخدمة وقضيتها ديلفري يومين وطلعت رجلي على الشيزلونج وآلام ضهري تخف شوية
انذار انذار: ممنوع تتنكدي او تنكدي عليه لأنه رايح يبات عند مامته .. دي حاجة عادية ولذيذة وليها فوائد لتجديد الحياة الزوجية
طولت عليكي جدا قولي مطولتيش
يوم عيد الأم تروحي طبعا بلا اي عتاب ولا تفتحي كلمة يا ستي .. ولو هي فتحت مترديش وتغيري الموضوع
من ع الباب عشر دقائق مع هدية شيك جدا وهي محتاجة ليها
اقعدي يا عنيده
معلش يا ماما سايبة القطة بتاعتي بتولد "هي هي هي .. اتصرفي" هي طبعا فاهمة وعارفة انتي مقعدتيش ليه .. طظ .. الواجب واجب
يؤسفني انها عملت كده ووالدك ووالدتك معاكي .. لأن ده جرح كبير ينم على انها ست معنديهاش سوشيال بوليتيكال كومبريهنشن .. بس تكلميها تاني وتوصلي المتقطع .. نيفر نيفر اجين
يعني معاملات دبلوماسية بحته بين البيتين ينم عنها أنها ريحتك اكتر مما تتوقع
هي ها تسكت؟ طبعا لأ لازمن تقابلك بخطة مضادة .. ها تتصل وتكتر زيارتك في بيت ابنها .. عادي .. عاوزنا نرجع زي زمان .. بعينك ياض
هي تزور تتخدم فايف ستارز "لله ياماما علشان ربنا يردهولك في الواد حزنبل ابنك ان شاء الله"
تضحكي في وشها بس بدون سماح بسنتي تجاوزات عن الكلام الدبلوماسي
تحط مناخيرها في بيتك .. ياريت اشوف ليكي اي منظر عفاريتي
جوزك طيب ومهذب وبيراعي ربنا .. وعلشان كده انتي دايبة في دباديبه
لكن كرامتي وحبي كفه واحدة غير قابلة للتفصيص أو الانتقاص
اظن بقى زهقتي من ستيته
ولو عاوزة حاجة تانية اءمري أي خدعة
عايزه راي
ياريت تاخدي موقف جامد متتنزليش عنه
واللي يقولك جوزك عليه تعمليه بس لما ياخدلك حقك
هو قالهم اتصلوا واعتذروا ومعملوش اي حاجه من اللي ابنهم طالبها منهم
يبقي دلوقتي الغلط عندهم
وبعدين انتي معملتيش حاجه ولاكبرتي الموضوع
انتي قولتي لجوزك وهو اتصرف
المهم دلوقتي من راي
انك لو مخدتيش موقف حازم هتبقي صدقيني ملطشه
وكفايه راي البنت في امها
وانا اعرف واحده صحبتي وصحبتي جدا اخت جوزها قالتلها نفس الكلام علي امها وطلع صح فعلا الكلام
المفروض ان حماتك لو عندها حسن نيه انها تتصل وتفهمكم الكلام وانها متقصدش حاجه
وبصراحه انتي غايظاني اوي في حكاية مسح الشقه ديه
اومال فين بنتها وكمان معها بنت مش متجوزه
ومش معني كلامي انك متعمليش حاجه عند حماتك
لا غلط وغلط جدا
انا اقصد خفيف خفيف وخصوصا انها عندها بنات يقدروا يخدموها وانك انتي يادوب مرات ابنها
مش بنتها
وبعدين هي لو صحتها حلوه يبقي هي تعمل لنفسها
ومش منطق ابدا علشان روحتي بتي هناك يومين انك تعمللها الشقه
وحتي في اسواء الظروف لو اضطريتي تعملي ومعرفتيش تهربي بشياكه
تعرفي جوزك انك بتعملي علشانه هو علشان حبك ليه
وانك مش مضطره تعملي حاجه لحد لانه ده مش واجبك ده مجرد زوق منك
وبلاش حبك لاجوزك يخليكي تعملي حاجه غصب عنك
صدقيني انا بقولك كلام انا بعمله
انا من كتر حبي في جوزي كنت بطاطي كتير بس كنت بعرفه وافهمه انا بعمل كده ليه ( علشانه )
تعرفي انا عندي سلفه كانت شيلاهم شيل كلهم
وهي الحيطه المايله بتعتهم
كله بيلطش فيها وانا اول متجوزت معجبنيش النظام ده خالص فقررت ابعد
ومحطش نفسي في مقارنه مع حد ابدا
ياريت تاخدي من كلامي اللي ينفعك وينفع حياتك بس
ومش كل الناس زي بعضها خالي بالك
لان في الدنيا بلاوي كتير
والشاطر بس ان لما يلاقي نفسه هيغرق يلحق يخرج من البحر قبل متيجي موجه تخللللللص عليه
انا بقي قررت اخرج من البحر
وياريت تخلي العصبيه المستخبيه ديه مستخبيه خالص خصوصا مع اهل جوزك علشان محدش يغلطك
تحياتي ليكي ياقمر
حماتي قنبلة ذرية
ده فيلم بس هو في نفس الوقت عنوان التعليق
معلش بقا اصل الحمة ديه قدر على كل واحدة سعيدة بس بجد حماتك ارحم من ناس ككتير اوي كان على ايدي طلاق بسبب حماة وربنا يبعد عنك شر اذية الحماةوبس انا لو منك اتصل بجوزك استشيره عشان انتي لو عملتي اي حاجة يبقى عداكي العيب ادام جوزك بس برده اعمله الي قلبك عايزه يعني حاسة فعلا انها مكنتش تقصد عادي كلميها وبعد يومين من عيد الام روحيلها ديه هتعرفها اكتر وتاخدلها هدية ده لو زوج كقالك روحلها اما غير كده اتصلي بيها بعد يومين قوللها كل سنة وانتي طيبة و انا معرفتش اكلمك عشان كنت تعبانة اوي
تحياتي لكي بدوام السعادة وربنا يبعد عنك شر اذية الحمة
اللهم اجعلني نورا للخير وللغير
الموقف ده حصل بردو مع بنت خالى و الصراحه مابقتش تروح الا لما جوزها يكون معاها و كمان من غير مايكون فى بيات خاااااااالص
بس بجد هو موضوع بايخ جداااا ..و انتى مش كبرتى الموضوع ولا حاجه
بس على فكرة فى امهات كتيربتعمل كده مع مرتات اولادها فى الاول و ده بيبقى نابع من انها متخيله انها اخدته و كده يعنى .. فتوقعى شويه مشاكل فى الاول
وحاولى تتفهمى الموقف و بعد كده بلاش تروحى كتير الا لما جوزك يكون معاك علشان بس تتجنى المشاكل اللى من النوع ده
بصى طالما بنتها كمان زعلانة منها وقالتلك بكرة الدور يجى عليكى يبقى خليكى حذرة منها اوى وعامليها بحدود كتير..عشان متديهاش الفرصة انها تخربلك بيتك..
يعنى حكاية كلامك معاها خليها على فترات متباعدة بلاش حكاية انك تكلميها كل يوم دى
تانى حاجة حكاية هدية عيد الام روحلها واديهالها من على الباب وامشى على طول وقوليلها انك مستعجلة او وراكى مشوار وهى هتفهم انك مش عايزة تدخليلها بيت وفى نفس الوقت مش هتقدر تغلطك لأنك جبتلها هدية بدل ما تخلقلك مشكلة جديدة مع جوزك
وياريت تحاولى تسافريله فى أقرب وقت ممكن استعجليه عشان تخلصى من مشاكلها وتبعدى وتبقى انتتى وهو بعيد عن المشاكل
وبلاش تحطى جوزك فى وضع انه يختار بينك وبينها لانه صعب.. خليكى زكية
زوجة لاعنيدة جدا
انت لا عنيدة ولا حاجة
انت طيبة جدا
فى بداية الجواز لازم يكون فيه مشاكل كثير ..اختلاف عادات اختلاف مفاهيم ..اختلاف تربية
عن مسح الشقة كنت اتمن لو اعتذرتى بلباقة امام زوجك
عن الفلوس دى عدم لياقة ويمكن اكثر شوية...
لكن المهم... ان دى امه وصلتك لن تنقطع بها شئت ام ابيت
ياريت تروحى فى المناسبات فقط
لعمل الواجب فقط بلا التصاق
حنى تتعلم كيف تعاملك وتكون اكثر حرصا على الا تخسرك..
وربنا يسعد ايامك.
من تجارب القدر وانا
طبعا لازم يكون ليكى موقف معاها
دى مش حاجه سهسله الى هى عملته ده
والمشكله انك ما تحطتيش فى الموقف ده لوحدك لا ماماتك وبباكى كمان
يعنى تتجنبيها بدبلوماسيه
علشان محدش يمسك عليكى غلطات او شىء من هذا القبيل
صلي عالنبي
زيدي النبي صلا
من غير تأويم ولا تهدية نفوس
أعتبريها مجنونة
وضحي الامور لجوزك وطنشيها عالاخر
شوفي هسألك سؤال
اما يكون عندك ابن تخلفية بعذاب وتربية بعذاب وتكبيرية وتعلمية و..و.....
وتيجي واحدة تاخدة عالجاهز
مش بأبرر
لكن ألتمسي العذر
أعتقد اساس المشكلة ان وقت جوزك في مصر قليل وبتتاخنقوا علية انتوا الاتنين اقول لك مش عاجبك مجونة اعتبريها ضرتك
لكن أوعي تخربي بيتك أوعي
طبعا موقف يغيظ جدا
وانتى طبعا اللى تغيظى اكتر يعنى ايه يعنى تمسحى الشقه معاها
بصى ياحبيبتى هى جت من عند ربنا
الحماوات دول مافيش من وراهم غير وجع الدماغ -رغم انى فى منهم زى البلسم ربنا يرزقنا يارب-
بس شوفى بقى ماتعتبيش على زوجك فى موقف امه
لكن خلى ليكى راى وقرار واضح انك مش هتروحى هناك منغيره تانى ابدا ولما تروحى مش هتباتى خالص
وده قرار مش بتاخدى رايه
هيقولك ماما ماكانتش تقصد وماتزعليش وخليها تعتذرلك قوليله لا مايصحش دى زى والدتى وانا يا حبيبى مش عايزه اعملك مشاكل خلينى بعيد احسن
اوعى تخسرى موقف زوجك ووقوفه فى صالحك
عدى كل حاجه وخدى قرارك اللى يعجبك ووصليله ان ده عشان انتى بتحبيه
وانتى كده هترتاحى تنامى براحتك وتصحى براحتك واخر جمال
واذا كنتى زعلانه انه هيبعد عنك استحملى شويه وهو من نفسه هيققل وجوده عند والدته وهيرجعلك
انتى بتقولى انه بينزل اجازات واكيد مش هيقضيها عند والدته
اجمدى شويه وانتى تكسبى
هديه عيد الام طبعا تديهالها وتكونى قايله لزوجك انك مش هتقعدى اكتر من 10 دقايق عشان يبقى عارف وماتروحش الوالده تشتكيله
فى الاخر هاقولك كلمه عجبانى اوى
اللى بيضحى فى الاول ويستسلم بيضحى على طول ومايستناش حد يضحى عشانه
واوعى تضحى بكرامتك وخدى بالك من نفسك
بصى يازوجة ..
انتى بتحب جوزك وهو فوق راسك واهله بتحترميهم وكل حاجة ..
لكن لازم من اول يوم من الجواز تحطيلك قواعد مهما حصل ما تتنزليش عنها خاصة فى تعامل اهل الزوج ..
الحماة بتفكر لما ابنها بيجوز انه جايبلها خدامة ..
مش انها واحدة كبيرة وعاقلة وبنت ناس وخريجة وفى ناس كتير بتحترمها ولها شخصيتها والاكتر من كل ده انها شايلة ابنها فى عينيها وبتقوم بخدماتها على اكمل وجه ..
حكاية التنظيف دى الصراحة مش مظبوطة تماما ولا كنتى مسحتى وتقعدى عندهم زى اى ضيفة بتزور ..
اه ممكن تشيى معاهم الاكل وده يكون اقصى حاجة ولا غسيل مواعين ولا تدخلى المطبخ وتحسسيهم ان المطبخ بالنسبة لك مكان محرم فى بيتكم زى اى ضيفة ..
ولى تعليق برده على حكاية الفلوس ما تعمليش الموقف ده تانى علشان ما تتعودش على كده ..
رايحة تكشف رايحة تشترى حاجة رايحة تتمشى ممكن تعزمها على حاجة انما ما تدفعيش ولا تمن كشف او اى حاجة تشتريها حتى لو كانت الحجة ان دى فلوس ابنها ..
ولو مرة حصل ودفعتى لها وكانت فلوسك وجوزك عرض عليكى الفلوس خديها لان هى مش من مسئوليتك ولو ابنها عايز يصرف عليها يبقى براحته انما فلوسك انتى لا ..
وبالنسبة لموقفها خلاص هى جالتك من عند ربنا .. وبقى ليكى حق انك لو قلتى ما هاتدخلى بيتهم تانى ما حدش هايقولك حاجة ..
وطبعا بعد الموقف ده ولا بيات ولا تنظيف بعد كده .. مش بعيد لو دخلتى المطبخ وتنظفى وتكونى انت صاحبة الواجب تقولك انا كنت قالعغة خاتمى وسايبه على الرخامة واختفى ..
ويبقى على ايه الترجيح .. شيل ده من ده يرتاح ده عن ده ..
وروحى ودلها الهداية ووما تقعديش حتى لو هم مسكوا ولازم يحسوا بتغييرك هم ربع ساعة وتقومى تتحججى باى حاجة ..
او من غير حجة كمان معلش لازم امشى ..
وتقولى لجوزك وتفهميه وطبعا ده رد فعل طبيعى ليكى لانهم على الاقل ما اتصولش يعتذروا ..
وهو هايشيلها لك اوى انك رحتى رغم تقصيرهم معاكى ..
ربنا يهدى الحموات كلهم ..
دُمتِ بخير الحبيبة زوجة طيبة جدا ..
يووووووه مشاكل الحموات مش بتخلص
وحكاية النوم عندها كل شوية معجبتنيش
انتوا لسه عرسان المفروض بشوية دلع واغراء تخليه يرفض ينام بعيد عن بيتكم وعش الزوجية
والي حصل فرصة انك تتهربي من الزيارات الكتيرة لحماتك بس برضوا حاولي تخلي المشكلة لصالحك و اتفاهمي مع زوجك بالعقل و اكسبيه لانها ممكن تخرب بيتك و توقعك مع جوزك
ربنا يعينك يا قلبي
اول شي انا بهنيكي ماشاءالله عليكي
بس انتي اهلك معهم حق ميدخلوش بيتها باللي عملتو قالتوا اما انتي فدي تبقي مامة جوزك يعني لو مش هتدخلي بيتها عشانها علي الاقل عشان جوزك مايزعل وتبقي حساسيه في الموضوع
مع انو كتر خيرو وقف معك وطلب منهم اعتذار بس انتي اعملي اللي عليكي وبس
عشان تكوني بنت اصول وواجب وبكره لاسمح الله محدش يقدر يقولك تلت التلاته كام بالمناسبه انتي فكرتيني باختي
حماتها كان الكل بمدح فيها وبمحبتها لاختي بس حصل شي لحد دلوقتي حماتها بتحبها بس هي ازت اختي كتير اختي كانت زيك تصحي من النجمه مع انو جوزها اصلا مش موجود وتقوم وتعمل فطار وغدي وعشي لخوانه علما انو مش اكبر واحد في اتنين غيرو اكبر منو ومتجوزين وحماتها دي تبقي مرلت عمي
انا هكتب عن قصة اختي بست انشاءالله بس لم الوقت يناسب وبترجاكي ادعيلها
وانتي زي مقلتلك حكمي عقلك عشان تفضلي ملكة قلب جوزك وبالتوفيق يااااارب
تحيــــــــــاتي
السلام عليكم
بصى هو انا طبعا معنديش اى راى بناء على تجربة او خبرة خالص لكن هقول راى
هو مشكلة فعلا واهلك ممكن يقاطعوا حماتك او بمعنى انهم ميدخلوش بيتها ماشى وتبقى العلاقات سطحية
لكن انتى مستحيل لانها ام جوزك وهتبقى جدة اولادك
عارفة دايما اسمعهم يقولوا ان الشاطرة هى ايللي تصاحب حماتها صاحبيها وكبري دماغك من اخطائها وحاولى تعمليلها طلباتها ولما تغلط فيكى عاتبيها براحة مع الوقت هتحبك الستات الكبار بيحتاجوا معاملة الاطفال خليكى سياسية
بعد كده هتبقى معاكى و في صفك اما لو ضدك هتقوم ابنها عليكى
ده راى وجربى وان شاء الله خير
وعيد الام قرب وفرصة تجيبي ليها هدية قيمة عشان هما بيشوفوا قيمتها بالذات لو حماتك
ولو جت تكلمك عن موضوع الفلوس والمشكلة قوليلها خلاص انا مش زعلانة لان اكيد حضرتك مكنتيش تقصدينا مش انا زى بنتك برده وفي نفس الوقت غيري معاملتك يعنى تبينى انك زعلانة شوية وان الموقف ده انتى مش هتنسيه وهما اكيد هيلاحظوا ده
من الاخر هى شوية مجنونة هتعملى المجنون ازاى تجنبيه وان كلمتيه خدى على قد عقله مش معنى انك تصاحبيها انك تبقى معاها ليل ونهار اقصد لما تبقي معاها وتمشى متبقيش سيبالها موقف او انطباع تشيله ليكى
يا سيتى مش بيقولوا ابعد عن الشر وغنيله ابعدى ولما تقربي غنى
احرجيها بالذوق
تحياتى ليكى
مع ان التدوينه طويله
الى اني قريتها من الالف الى الياء
لو كنت مكانك اطنش
واتمسك بموقفي
وما ادخل بيت اهل زوجي
الا لما يرجه هو بالسلامه
لازم تعوديهنهم من الاول
انهم ما يتجاوزون حدودهم معاج
والمكوقف كبير طبيعي
يعين انتي ما كبرتيه ولا شي
هذا رايي المتواضع طبعا :)
الاصول اصول
والحق حبيب الله
والاصول بتقول انك لازم تروحى لحماتك فى عيد الام ومعاكى هديه
علشان خاطر جوزك
وحطى حد للمعامله دى من البدايه وكفايه ان جوزك عارف انك مش غلطانه
وهيقدرك قوى وتكبرى فى نظره لو عرف انك بتراضى امه علشانه
الحق بقى
انك مش غلطانه والموضوع كبير لوحده فعلا
بس علشان جوزك اللى بتحبيه كله يهون
بجد اول مرة ازورك وتفاصيل او ظروف جوازك شبه ظروف جوازى بشكل غريب بس انا حاليا سافرت لجوزى خلاص من كم شهر بعد ماكنت واصله لمرحله انى نفسى اسيب البلد كلها بسبب مشاكلهم
بصى رايى ياعنيده انك تخليكى اذكى منهم متخليش غلط يتمسك عليكى زى اغلب التعليقات وفنفس الوقت اعملى الواجب ومع كل ده يتحط حدود انهم يحترموكى ومدام بنتها قالت كده خلاص اديكى عرفتى النظام
واحمدى ربنا انك مسافرة لجوزك قريب وترتاحيلك شويه من المشاكل ويارب يكوون وضعك احسن وميلاحقكوش فى معرفة الاخبار والافلام اياها
تحياتى لمدونتك وياريت تزورينى فى المدونه
امممممممممممممم
بصي ياستي
انا في البوستات قبل كده لما بتغلطي بقولكغلط وده من وجهه نظر اختك اللي هي انا يعني
بس كمان لما تبقي صح اقولك
انك تخدمي وتحبي والده جوزك اراضاءا ليه وتجنبا للمشاكل ده قمه العقل
تيجي علي روحك شويه علشان الدنيا تمشي وتبقي محبوبه وتمشي امورك انا معاكي واعمل زيك
بس اني اتهم بالسرقه ولو مجرد تلميح ده اللي ماقبلوش ولو فيها موتي
وجوزي لو مش قادر يجيبلي حقي انا اخده
انا لو مكانك استني اعتذار من الست دي ليا ولوالدي ووالدتي واعتذار من جوزك كمان
واهلي مايدخلوش بيتها تاني
كل واحد في حاله
وبعد االاعتذار هاتعامل معاها بس بحذر
لو ماحصلش يبقي كل واحد في حاله يابن الاصول انا في بيتي وهي في بيتها
دي انا ودي نصيحتي فكري وقرري اللي يكون في مصلحتك
انت طيبة جدا ومش عنيدة ابدا
والله يسعدك في كل حياتك
حل المشكلة بسيط جدا هو انك تتعاملي مع حماتك كويس جدا علشان خاطر زوجك واسألي عليها بس على فترات متباعدة ... يعني في المناسبات .. كل اسبوع .. 10 أيام .. ولما تروحي عندها ماتقوميش من المكان الي انت قاعدة فيه لغاية ماتروحي وياريت تكون الزيارة مش طويلة ووقتها محدود وفي المناسبات .. الله اعلم بنيتها اذاكانت ال50 جنيه الأولى الي المفروض انها تكون في شنطتها مش في المطبخ وقت مابتغسلي الصحون معها ...
عامليها معاملة حسنة زي مامتك ارضاء لله سبحانه وتعالى ولزوجك ولكن في حدود بحيث انه مايكونش فيه فرصة انها تعمل معاكي مشاكل ....
الله يوفقك
اطيب وارق تحية
كنت عايزه أقول كلام كتير جدا
وبعدين قولت أشوف ستيته توأمى الجميل
قالت أيه .. علشان ملتش وأعجن فى المتقال أصلا
بصراحه كفت ووفت وقالتلك على المفيد
من الأخر...
إللى عايزه أقوله برجوع إلى تجربتى الظريفه اللطيفه مع حماتى وأهل جوزى
ولأنى كنت زى حضرتك كربونه صحيح ممسحتش الشقه ..بس لو كان إنطلب من كنت همسح
نصيحتى ليكى ..
يا ريت تنفذى كلام ستيته بالحرف الواحد
وإوعى تتنازلى بتاتا بتيتا
عن أى بند من بنود الرفيقه ستيته
وأوعى تتهتى من الزعل والشويتين دول
حبه كده وهيروق ..أصل أنا عندى أخوه
فى البيت ربنا يحميهم طبعا إحنا بنموت فيهم وفى التراب إللى بيمشوا عليه ...بس ده شر لابد منه
ربنا معاكى ولو عايزه سلفه
300 جنيه علشان تسددى الفلوس إللى لزقت فى إيدك أنا سداده من جنيه لربع جنيه
كلمه أخيره حماتك ريحتك جدا جدا جدا
وبكرى تعرفى إن ربنا بيحبك لأن ده حصل
تحياتى لأجمل وأرق زوجه بجد مش هزار
تمسحي ايييييييييه ؟؟؟؟؟؟؟؟؟
انتى عبيطه يا بنتى ؟؟؟
وتقوليلها حاااااضر ؟؟؟
وتروحي وانتى عروسه تباتي هناك ؟؟؟؟؟؟؟؟
وتصحي من الصبح تطبخي وتعملي
طيب يا حلوه اشربيييييي
اولا ممنوع مانعا بااااااتا البيات عند حماتك انتى وجوزك من غير سبب
انتم لكم بيت يا حلوه
ناموا فى بيتكم وابقوا اصحوا روحولها
اوعي اوعي اوعي تتنازلي عن بيتك واوضتك وسريرك
ثانيا : انتى تطبخي معاها ااااااه
تغسلي الاطباق مع بناتها بعد ما كلتي معاهم زي بعضه
انما تعالي امسحلي الشقه ده استهبااااال
شوفي يا قطه قولي ما باعرفش امسح ماما كانت بتجيب واحده تمسحلنا
واهربي منها ما تعمليش الحركه دي ابدا
ولما جوزك يقولك كنتى قاعده عندهم قوليله طيب خلاص فضينا المولد كل واحد يقعد فى بيته
عايز يساعد امه يتفضل يقوم يشمر ويساعدها مش عيب خالص مالص يعنى
انما خلي بالك لو مسحتي الشقه دلوقتي
هاتفضلي طول عمرك تمسحيها ولو قلتى مره تعبانه هاتقلب عليكى غم
عزي نفسك فى الشغل اوووووي عند حماتك بحيث انك يوم ما تغسليلها طبقين بعد سنتين كده تقول فيكى شعر مااااااااشي ؟؟؟؟؟؟
ايه البنات الخايبه دي تعالى اتحطي جنب البت اختي تعالي
وموضوع الفلوس ده موضوع خاااايب ما تبصلوش اوي هى كان قصدها ترخم عليكى لانها اكيد اكيد شايله منك ومعبيه
اه من غير سبب هو كده انتى وحشه وخلاص
ان كانت الغله تيجى اد التبن الحمى تحب مرات الابن
المهم يوم عيد الام تروحي وتاخدي هديه وزياره ربع ساعه كده نص زي بعضه وتخليكى رسمي فى الكلام مع الكل هناك من غير غلاسه ولا تتكلمي فى الموضوع
ولو فتحته قوليها حصل خير ياماما وقفلي على الموضوع
وبعد كده تعملي لها زياره كده كل شهر مره مثلااااا او مرتين فى الشهر انشاله ما حد حوش على نفس المنوال ربع ساعه وبس
وتكلميها فى التليفون برضه مره كل اسبوع
وخلصصصصت
وطبعا بقى لو فى ظروف مرض بتاع كده يعنى يبقى تليفون لطيف او زياره سريعه
وواجب وخلااااااااص
ما تستنيش منهم يردوا الواجب ولا بتاع ما حدش عاد بيعمل كده
وانتى زعلانه انك كنتى بايته عند حماتك وبتقولك صاحيه متأخر
طب تعملي ايييييييه لو كانت حماتك هى الى قاعده عندك لمدة خمس شهور وهى الى بتسهرك لحد الفجر ترغي معاكي انتى وجوزك
وتنام هى للظهر وتصحى تلاقي الغدا جاهز
وبعدين تلف الدنيا كلها تقول بيناموا العصر ويسبوني قاعده لوحدي ؟؟؟؟؟؟؟؟
وتقابل ابويا عندي فى البيت تقوله قدااااامي اهم طول النهار قافلين عليهم وسايبين قاعده لوحدي
هههههههههههههههههههههههههه
طب اقولها ايه دي ؟؟؟؟؟
وانا بالعافيه كنت اخطف نص ساعه ومعايا مريم عمرها خمس شهور ؟؟؟
وطبعا هى ما كانتش بتشيل ورقه من مكانها
اصبري يا بنتى لسه الطريق طووووووويل
بس ما تنسيش موضوع الناموس ههههههههههههههه
شوفي ياعنيده ياعسوله
انا لسه ضغنونه ومليش خبرة
بس احب اقولك انتي مكبرتيش الموضوع ولا حاجه هو كبير ومنيل لوحده
و
لازم لازم لازم
تعرفي اهل جوزك انك مش عبيطه مثلا ويتدحك عليكي
يعني خلي لنفسك شخصيه
يحبوكي وفي نفس الوقت يخافوا من زعلك
عشان مش يركبوكي بعد كدا
وحاولي تعملي اللي يرضي جوز حضرتك وانا دا اللي شايفه ماشاء الله علكي صبورة جدا
ربنا يعينك
والله مش عارفه الاقيلك حل في الموضوع دا بس عجبني رأي خالتو ستوتة
دمتي بكل ود وخير
تحيـــ بسومةــاتي(:
تحياتي
المفروض ان زوجك يقدر الموقف...و يدرك
ان بدءاً من هذا اليوم الامور لن تكون
طبيعية بينك و بين امه...
لهذا..يفترض ان يكلمك ليطلب منك عدم الذهاب الي هناك الا بصحبته حين عودته الي مصر...
او الي ان يسارع بسفرك اليه هناك حيث يعمل...
و اعلمي يا أختي الفاضلة ان هذه ليست
مشكلتك انت فقط...بل مشكلة معظم الزوجات اللائي يعمل ازواجهن بالخارج..
و يتركن زوجاتهن...لان الام في معظم هذه الحالات تحاول لعب دور الحارس او الزوج
الغائب....
ربنا يهدينا الي سواء السبيل...و ينير
بصيرتنا...
اصبري و احتسبي اجر صبرك علي الله...وان
شاء الله سيقسم الله لك من أمرك خيرا.
تحياتي و تقديري
ههههه
الله يكون في عونك
مش عارفه لو حماتى عملت كده هاعمل ايه بصراحه خصوصا انى عصبيه وللاسف سريعه في رد الفعل
يارب اتجوز واحدمامته مش موجوده
هههههه
انا قريت البوستس كلها
جميله اوووووى
ربنا يهديكوا لبعض ويصلحلك الامور
انا شايفة ان علاقتك بحماتك تكون مقتصرة جدا وفى اضيق الحدود
منعا للقيل والقال
بقولك ايه انا فكرت في الموضوع
لقيت ان متروحيش عندها غير بقى لما جوز حضرتك يرجع وتشوفو حل
اصل اللي هيا عملته دا لايحتمل
مودتي
يا نهار ابيض
اى واحد فينا بيتمنى ان مراته تشيل امه فوق راسها
تصدقى ان من اهم اسباب فسخ خطوبتى ان خطيبتى مكنتش بتحب امى؟
بجد موقف مامته منك غريب جدا جدا
وجت حكاية الفلوس دى كملت
بجد مش عارف اقولك ايه
لكن عاجبنى اوى اوى استحمالك كل دا علشانه
ربنا بجد هايكرمك اوى علشان كدا
انا رجعت
عاااااااااااااااااااا
شوفي انا بكلمك مش بتوقعات كأغلب التعليقات
لكن بكلمك بخبرة كبيرة مش واخداها من الجواز بس لكن من حبي لقراءة واستقراء حياة الآخرين
زوجك عاقل جدا جدا جدا
ها يبقى عارف امه نوعها ايه وها يبرها بس مش ها يسمح بتصادم وتناطح أهم ستتين في حياته .. ها يشيل ده من ده ويرتاح ده عن ده
الزوج ده نادر ندرة الديناصورات
زوجك بيحب امه مش زي النوع الأول
ليش يا سوتيتة؟
لأن النوع الأول مش بيبات
بيبر وما يصدق يخرج من البيت وعارف المشاكل اللي تحصل من شدة القرب
يبقى جوزك من النوع الثاني
النوع الثاني
بيحب امه جدا
بيحب عروسته جدا
عروسته لسه مالكة عليه كيانه
وعارف ان امه غلطانه جدا جدا جدا
عمال يعمل محاولات مكوكية كعاها تصلح غلطها في اهل مراته
هي راكبه دماغها
بس ها اقولك النتيجة ولله الامر من قبل ومن بعد
بعد دمعتين اتنين من امه
او اول ازمة صحية حقيقية او مفتعلة منها
صدقيني يا عنيده .. ها يقلب عليكي بلا اي منطقية او تفكير
الأم الواحد معاها مش بيمشي بالمنطق وايه ينفع وايه مينفعش
الأم الواحد مسلم ليها نفسه حبا وولها غصم وأتدار
النوع التالت
"انتي اللي تعرفي جوزك من اي نوع .. وان كنت ارجح رقم اتنين من كلامك"
النوع ده ياقطتي ماما ويولع الكون
تغلط ما تغلطش ملعون ابو التخين
بتحبيني ترضي ماما وعلى راسي زعلك وزعل اهلك حقكم عليا كلكم
وحبيب امه مع الست امه قادرين على نسف اي بيت من اساسه الأسمنتي
لو انا مكانك مش بس مش ها اروح
لأ انا كنت ها العن تييييييييييييييت ابوهم وامهم رد شرف لأمي وأبي
بس انا وحشة ياعنيدة
عندي وحش
وكرامتي وحشة
ولما اغضب اتعمي
وقدام ابويا وامي انسف اي راجل بأهله
وده شيء لا انصحك بيه
لأن ده مش طبعك
وانتي متربية عني انا البورسعيدية البشعة البيئة السيئة الغضوبة الشريرة
وبما ان حسب اقوالك انا حكمت ان سي السيد تبعك من الصنف نورمندي تو
تأكدي مهما شفتي منه حنية وحسيتي انه مش زعلان .. قريب قوي ها تندمي على عدم المرواح
واقل الأضرار انه ها يتجاهل مامتك انتي كمان
وانتي ها تشتعلي لأن مامتك ملهاش ذنب بالعكس دي هي مظلومة وفيه قلة ادب حصلت معاها
وهو ها يرد ببرود جدا
تتجاهلي مامتي لك مثلها
ها تحاولي تتفاهمي معاه انك مجني عليكي
ها يصم الآذان
اولا لأنها مامته جزء من لحمه ودمه "أغلى جزء"
ثانيا لأنه مش ها يفضل العمر كله مكسوف من عملتها السودة
اتصرفي ربنا يهديكي للخير
ومنهم لله اللي بيضروا الشباب
هدى الله حماتك .. ووفقك لما يجعل بيتك يقوم ويقف على حيله
انا معا ستييه في كل كلمة
كمان والدتك ووالدتك ما يدخلوش بيتها تاني الا في الافراح والمياتم بعد الشر
لكن انتي قضيها تليفونات.. البسي وش التمساح يا جميل.. اضحكي في وشها واحتسبي الضحة وخلاص
يوم عيد الام ما ينفعش بوتايتا ما تجبلهاش قنبلة قصدي هدية شيك وغالية
روحي وعشر دقايق وباي يا طنط اصل عندنا ضيوف من البرازيل وانتى عارفى اسكوتلاندا حر اوي ولازم الحق الغسيل من التلاجة وسلااااااام
لا تخدمي في بيت حد.. ولاا حد يطب المطبخ في بيتك
وعلى فكرة الحوات الفاتنات دول هم.. لما بيكونوا قنابل
بعد الشر عليكي طبعا ومش بفول.. بس المخفية حماتي كانت سبب رئيسي في فسخ الخطوبة
قولت لابنها خد امك وسونفاسون كدا على الكوبري كلوا زرين بطاطا
رغم انه كان حب وشحتفه 3 سنين قبل الخطوبة
عاوزة منك طلب
ليه مش بتدعي ربنا كتير كتير
سبحانه بيده قلوب العباد
اللهم لا تزغ قلوبنا بعد إذ هديتنا وهب لنا من لدنك رحمة انك انت الوهاب
اللهم يا مقلب القلوب والأبصار ثبت قلوبنا على دينك
تحصنت بذي العزة والجبروت .. واعتصمت برب الملكوت .. وتوكلت على الحي الذي لا يموت .. اصرف عنا الأذى إنك على كل شيء قدير "3 مرات"
والله انا معاكي بقلبي وعقلي في مشكلتك
بس بخاف لحسن اكون بنصحك غلط
بحبك يا طيبة انتي
لا طبعا روحي لها فى عيد الام بس ما تطوليش
وماتمسحيش لحد طبعا لو مسحتي النهارده هاتفضلي تمسحي طول عمرك
ولا تنسوا الفضل بينكم
بصي ياستي انا قريت مشكلتك وظروفك نفس ظروفي لان انا كمان جوزي مسافر والاكبر من كدة اني عايشة في بيت واحد مع حماتي وهاقولك انا بعد سفر جوزي باسبوعين عملتلي مشكلة كبيرة لدرجة اني رحت عند ماما مقدرتش اقعد في البيت وبعد كدة جوزي جابلي حقي منهم بصي اهم حاجة في الموضوع جوزك قربي منه وحبيه هو هيقف جانبك حتي لو كان بيحب امه اوي بس هيكون حبك انتي اكبر وخدي المواضيع بحكمة وصبر لان مش هينفع هو يتفصل عن اهله ولا ينفع انتي كمان ميكونش فيه كلام مابينكم وصدقيني واحدة واحدة الامور هتتعالج والله انا باقولك عن تجربة واللي حصلي في اول جوازي مكانش شوية بس استحملت علشان خاطر انا باحب جوزي ودلوقتي عارفة مش عاوزة اقولك انا عندهم ايه بيحبوني دلوقتي كتير
كل الحكاية انا مش عاوزاكي تخسري حتي لو حاجة بسيطة
ربنا يهديلك الحال ويسعدك
تقبلي مروري
اولا المدونة جميلة ودة اول مرور عليها
ثانياً مشكلتك حلها سهل جداً جداً
..طبعاً القلوب بيد الله سبحانة وتعالى وكل ما تفعلية ان تتقربى الى الله بجد وتدعى الله ان يصلح بينك وبين أم زوجك وسوف يؤلف الله بين قلبيكما ان شاء الله ادعى قبل صلاة الفجر بإخلاص ....
جربى مش هاتخسرى حاجة
ادعوكى لزيارة المدونة
أكيــــــــد
موقفك جميل جدا و عجبني موقف جوزك انه معاكي الحمد لله و نصرك
بس هتعملي ايه اديكي حاطه صوره مدونه حماتي ملاك وليها مواقف زي دي تماام معاكي
هما الحموات ساعات بيقرفوا البنات وساعات بيكبروا في السن ويبقوا صعبين قوي
خليكي مع جوزك مدام بينصرك و اسمعي كلامه و حلو الموقف اللي خدتيه عشان كرامتك
مشاكل مشاكل مشاكل
تيرارارار
بدايه ربنا بجد يكرمك ع حبك لزوجك وع محاولة ارضاءه وارضاء اهله طول الوقت
وصدقينى مدام انتى بدئتيها كده
يبقي محدش يقدر يقول الغلط عليكى
انتى ليكى الحق وكلالحق فالموقف اللي انتى عملتيه
وكويس فعلاااا ان زوجك وقف جنبك وحاول انه يردلك كرامتك
بس انابرده عندى فكرة صوغيره كده
لو حماتك لحد عيد الام فضلت ع موقفها
ومتصالحتوش
انتى سيبها الفترة دى ومتكلميهاش تانى لحد ماهى تصالحك وتعرف انها ظلمتك
بس معلشي انا هطلب منك انك ف عيد الام تاخدى هديه حلوة كده
وتروحى تزوريها وتتكلمى معاه فالموضوع
وجها لوجه كده وعارفيها بالذوق يعنى انك استحاله تعملي كده وانك بتحبيها وبتعزيها
وانها برده عشان ف مقام والدتك انتى جيتى لحد عندها عشان تتكلموا
وشوفي رد فعلها ايه
ان شاء الله الموضوع قبلها يتحل او وقتها يتحل وترجع الميه لمجاريها
عارفه الموقف ده هايفرق جامد اووى معاكى قدام نفسك وقدام جوزك وقدامها
وتبقي عملتى اللي عليكى ورضيتها لاخر حاجه
على فكرة بقى
مرواحك فى الظروف دى معلش بقى مش مقبوله ولا مطروحه اساسا
معلش لكن لكل شئ حدود
!!!
دى حماه من النوع التقييييل
بس جوزك هو الى لازم ياخد موقف
مش قالت حتتكلم تعتذر؟؟؟
لما تتكلم ابقى شيلى هم اللى جاى..
واذا انت عاوزه يبقى عداكى العيب بالقوى
ابقى يوم عيد الام ابعتيلها ورد..
يا حلاوه يا ولاد ال لاقوا 200 جنيه ال
دا انا لو مكانك
كانت ابامهم بقت سودااااااااا
يسلم فمك يا ستيته
والله ما يتقال بعدك كلمه
100%
حبيبتى ياعنيدة
انت طلعتى غلبانه قوى ولا عنيده ولا حاجه...اولا انت غلطانه جدا جدا انك تروحى وتمسحى الشقه لحماتك ....؟؟؟؟؟؟ ليه اصلا وهى عندها بدل البنت اتنين ؟؟؟؟؟؟
ممكن اه وانت عندها تدخلى الاكل او تغسلى الاطباق ...وده كمان كتييير..
لازم تحطى قواعد فى علاقتك مع اهل جوزك...مايدخلوووش فى حياتك ..(من غير ماتغلطى فى حد فيهم )
وخصوصا امه ..الموضوع ده فيه جانب كويس وهو انك هتقللى زياراتك لحماتك وكمان زيارة اهلك ليهم ...وده احسسسسسن كتييير قوى ..
ده مايمنعش انك تزوريها عادى فى الاعياد والمناسبات..علشان ماتغلطيش نفسك...وماتقعديش ..والمرواااح بعد كده مع جوزك بس ..لو مافيش مناسبه يعنى..وماتقوميش من مكانك...وبأكد على الموضوع ده...وماتفتحيش مجال لمناقشة الموضوع ده تانى ....
كده هى هتاخد منك موقف وهاتعملك حيااب قوى ...وجايز تجر ناااعم بعد كده ....بس برضه اوعى تغيرى
موقفك ...وربنا يجمعك مع جوزك وتروحيله ...هيبقى الوضع احسن كتير قوى ان شاء الله
تحياتى ليك
السلام عليكم ورحمة الله وبركاتة
لفت اسم مدونتك ( يوميات زوجة عنيدة) فطبعاً قلت هو المكتوب باين من عنوانة لكن خليني ادخل المدونة واشوف الزوجة العنيدة مما تشكوا مع انها من البداية اعترفت بعلتها انها عنيدة ولما تتبعت الموضوع حسيت من نبرة كلامك ان حماتك ده انسانة وحشة وبالعكس انا اللي شعرت بية انها بتعاملك زي بنتها ...لحظة لحظة انا ما تستعجليش اسمعيني للاخر لو سمحتي ...يعني لو قالتلك ساعديني ولو عندها بنتين مش مشكلة كله ايهون علي خاطر زوجك اللي ايعامل امك حلو زي م انتي قلتي وحماتك لو هي زي ما قلتي انسانة واضح علي نياتها بس ما تعرف تتصرف صح وهي قطعا غلطانة باتهامك بسرقة الفلوس او اتهام اهلك وكان واجب عليها تعتذر لوالدك ...انا قلت رائي بصراحة وارجوك ما تزعلي مني ونصيحتي لك بطلي عناد لزوجك لان في امراة صالحة نصحت ابنتها قبل زواجها وقالت لها كوني له امه يكن لكي عبداً وعلي شان تستمروا في حياتكم الزجية بسعادة احيانا يجبب التغاضي عن بعض التصرفات التي لا تعجبك من اهلة ومنة وهو كذالك يجب ان يتغاضي عن اشياء قد لا يحبها فيك وفي اهلك
دمتي اختي العنيدة وارجوا ان اعود لمدونتك واجد اخبار حلوة عنك وعن زوجك وعن علاقتك بحماتك
سلام
البوست طول أوي
اية الحكاية
حماتك ربنا هداها ولا اية
الشر برا وبعيد
دة احنا كنا زعلنا جدا لان كدة هنتحرم منك
انا ليا راى انك تجيبى هدية وتكون غالية وقيمة وتروحى عند حماتك وتقدمى ليها الهدية قابلى الاساءة بالاحسان وافتكرى موقف الرسول صلى الله عليه وسلم مع الراجل اليهودى الذى كان يلقى بالقاذورات امام منزل النبى صلى الله عليه وسلم. مهما كان دى ام زوجك وفى مقام والدتك ياريت تقابلى الاساءة بالاحسان وكله بثوابة
على فكرة انتي مش عنيدة بالمرررة لاعكس
اولا موضوع انك تنضفي معاها الشقة ده عليه تحفظ لو هي صحيا محتاجة مساعدة اوكيه
لومعندهاش بنات ماشي لو مش مقدرتها تجيب شغالة تساعدها ولو مرة في كل اسبوع ونص ممكن
انما تتصل بيكي من بيتك تروحي تنضفي معاها لا طبعا
وكمان لسة عروسة
ممكن تساعدي على خفيف وانتي هناككانك مع مامتكاما موضوع الفلوس ده فطبعا انتو ما كبرتوش الموضوع ولا اي حاجة هو كبير لوحده لان لو مش اول موقف عرفت ان دي منطقة حمرا ممكن تسرقك حاجة اكبر من كده وتيجي تقولك العراف قال وده عمره ما يكدب
بالتوفيق وتقبلي تحياتي
اخيرا الصفحة فتحت بقالي 3 ايام مش بتفتح معايا بصي يا حببتيانا قريت معظم تعليقات كمان اهو نستفيد بردوا اكتر كلام عجبني دكتورة ستيتة وفعلا مفيد جدا وربنا يوفقك ويكرمك مش قادرة اقول نصايح بعد كلام اللي قريتة ف تعليقات
ربنا يسعدك ويوفقك
دمتي بالف خير ووفرح
بصراحة انا لو مكانك مش هقاطعها بس هخلى المعاملة رسمى
يعنى اروح عندها فى المناسبات واكلمها لما يكون فى حاجة وبس
مش اكتر من كدة
والباب اللى ييجى منه مشاكل بلاش منه
عنيده ايه بقي
اولا اذيك يا اللي مش عنيده ربنا يصلح احوالك واحوال اهل زوجك ان شاء الله بصراحه انا جايه رخامه
اقولك ازاي ؟عجبتني المدونه واموت في الحكاوي زي عنيه بس بجد مش عارفه ارد اقول ايه هي حجات محيره بس كل اللي اقدر اقولهولك حاولي تقصري العلاقه بقدر الامكان عشان بجد مهما كان بتحبي زوجك وهو بيحبك لو حصل مشاكل بين الاهل انسي اه والله ده بيحصل كتير
ودعلها بالهدايه وصلي كتير واستغفري ربنا وقيام ليل ودعي ربنا يحببها فيكي وسبحان مغير القلوب وخلي عندك ثقه في ربنا وخالي بالك كويس انها ام زوجك يعني دي اهم حاجه عنده مهما تزعلي منها وتشتكي هي مامته ومش هيتقبل منك اي حاجه فحاولي تكسبيه وانا من رأي والله اعلم تعملي الواجب وتروحي في عيد الام وابدأي انتي بس قصري العلاقه تماما حتي خليها تليفون كل فين وفين وان شاء الله تروحي لزوجك وربنا مش يجيب مشاكل
موضوع الفلوس قبي احسلك بيهم يا اما بالنص انا وانتي(وش مطلع لسانه)
بهزر
ربنا يهديها يارب ويصلح احوالك
تحياتي
ابصى يا ستى انتى موقفك واللى بيحصل معاكى قريب اوى من اللى جدتى كانت بتعمله فى ماما بس مع فرق انها كانت اكبر شويه من مشكلتك ...
مش هاقولك عاملييها عادى بس حاولى فى نفس الوقت تورى جوزك انك احسن من مامته تعاملى معاها كأنها اى ضيف بيجيلك او بتكونى عنده كلامك يكون بحساب قدامها ولو غلطت تشهدى جوزك ومش تقولى لها حاجه لأن ده هيريح دماغك انتى حاولى تكونى حياديه جدا لأن الست ده " امه " يعنى مهما كان مش هيقدر يزعلها وليكى الجنه والله واللى هتعمليه دلوقت هيترتب عليه حياتك كلها مع جوزك وصدقينى هى هتزهق من نفسها لما تلاقى مفيش فايده
ربنا يهديها من عنده
تقبلى تحياتى ....
عزيزتى
هى غلطت فيكى اه
بس الزوج هيعمل ايه
وانتى علشان ترتاحى ومتحيريش نفسك
عليتك تاخد موقفها برحتهم
وانتى استشيرى زوجك تعملى ايه
ولو طلب انك تروحلها فى عيد الام روجى
معلش علشان الزوج تقبلى منها حاجات كتير
وساعات السن بيحكم
بس اوعى تحولى تضغطى على زوجك فى اى شئ نحيت امه
لان اللى ملهوش خير فى امه
مش هيكون ليه خير فيكى
تحياتى
سلام
السلام عليكم ورحمة الله وبركاته
ربنا الهادي
لكن في أغلب الظن ان حماتك سيدة كبيرة في السن - فيه ناس كده بيعشقوا المشاكل
وكويس ان عندك فكرة مسبقة عنها
طبعا الموقف بايخ جدا
وأنتم مش كبرتوه ولا حاجة
لازم يكون فيه اعتذار واعتذار بقوة كمان
لأن ده طعن في الشرف والامانة
بفرض انك أخديهم (( وده أبعد افتراض بعيد جدا))واعذريني في هذا الافتراض
المفروض ان ده مش يكون رد فعلها وده علشان خاطر ابنها
والمفروض ان الموضوع يتعالج بطريقة مختلفة عن اللي حصل
وهي لازم تعتذر لك ولأهلك
والاعتذار لأهلك يكون أهم وأولي
أدعيلها بالهداية
أي جزء من التعليق مش يعجبك
أو يكون غير موافقة عليه
أو غير مفهوم
ممكن تحذفيه
بصراحة بأشوف انك حضرتك لازم تريحي والدة زوجك
وتشليها(تضعيها) جوة عنيكي مهما كانت سيئة
اختيارك لزوجك معناه أنك قبلتي
الجانب السئ والجانب الحسن في كل حاجة تخصه
اتخذيها أما لك بمعني الكلمة
وتصوري الموقف ده مع والدتك
بماذا كنتي ستردي وماذا كنتي ستطلبي منها
،،،،
أستأذنك تحذفي هذا التوضيح
تقبلي تحياتي
بصي بقي في اول الزواج ياما بيحصل وخصوصاً موضوع البيات عندهم والمواعين والشقة والذي منه وتروحوا بدري ومتتأخروش ويومهم في الاسبوع متتحركيش إلا من بيتك لعندهم بس وحسكوا عنكوا تروحوا اى حتة تانية عادى ، في الأول وزى ما بيقولوا ابنك علي ما تعوديه تتعودوا تباتوا بارة بالساهل تفضللي تباتى بارة بيتك علي طول وهكذا المهم انك تتصرفي في الامور دى بطريقة دبلوماسية بالراحة جداً لحد ما الامور تستقر اصل في الاول كل واحد ايز يمشي التنانى علي مزاجه ، وبعد شوية الدني بتهدا وتستقر ، رتبي افكارك واقعدى مع نفسك اعملي خطة شارونة تكسبي فيها الامور وربنا معاكي يا جميلة
احب اقول لك كلنا مرينا بكل الامور دى
ستوتة حبيتى
كلامك عجبنى اوى فكرت كتييييييير ووصلت لقرار اخير
هبقى اقولة قبل التنفيذ
بحبك يا احلى ستوتة
حواء
الحمد لله ساعات الانسان بيكون نيتة حلوة بس بيبان بعد كدة نية اللى قدامة
بس انا مش ضعيفة ولا هفية وهسيب دة للايام تبقى تعرفهم
مش من تصرف لكن من تصرفات بس عقلانية
تحياتى
عمرو
انا كل اللى مخلينى لحد دلوقتى مش أخد موقف جوزى
وانا عملالة خاطر
تحياتى
سويت
انا عايزة اعرف ازاى هى متخيلة كدة هو اصلا بقالة اربع سنين مشمعاها مسافر
يعنى هو كان بينام فى حضنها
عجبى
تحياتى:)
غير معرف
ربنا يخليك انا طيبة ماشى
نا قلت بلاش اعتذر يمكن يرد هو بلاش تصدام من اولها
بس الحمد لله مش عملت حاجة
وفعلا انا مش هقدر ابعد عنها الصلة موجودة
وربنا يهديها ويهدينى
تحياتى
نودى
هحاول اعمل كدة بس ادعيلى
تحياتى
مصرى جدا
علية افضل الصلاة والسلام
مش هقدر اعتبرها ضرتى وبعدين هو بقالة اربع سنين بعيد عنها
ويعنى هو كان بينام فى حضنها
ربنا يهديها ويهدينى
بندقة
اة يا اختى شفتى خبتى كنت هسمع الكلام وامسحلها الشقة
ويا رب يرزقك بالبلسم دول
انا فعلا مش هروح هناك من غيرة
والحمد لله هى جابتها لحد عندى مفيش بيات هناك خالص
ولا تضحيات بالمرة انتهى عصرها
تحياتى
لجين
اة انا فعلا بعبة بعبة
وانا عارفة انى غلط فى حاجات
بس بصى رب ضارة نافعة
انا هقلب الموقف لصالحى
هتشوفى يا بنتى هعمل اية
تحياتى
نوارة
انا هعمل كدة بالظبط
دا لو قعدت افكر العمر كله مش هعرف اعمل ولا اجيب فرصة زى اللى هى عملتها
تحياتى
عاشقة القمر
الله يخليكى ادعيلى وربنا مع اختك ويبعد عنها الشر
انا بحاول احكم عقلى فعلا
وربنا يستر
بنوتة
انا زعلانه اوى انك قفلتى المدونى طب كنتى سبيها عالاقل وبعدين ارجعيلها
بس مستقبلك اولى
بعد الامتحانات هستناكى تفتحى واحدة تانية
دون اعذار
وفكرة ان انا اصاحب حماتى صعبة شوية
هى وبناتها مش اصحاب هتكون معايا انا صحبة
لالالالاء
وربنا يوفقك
اقصوصة
ربنا يخليكى انك كملتيها للاخر معلش تعبتك معايا
هعمل كدة بالضبط بس بطريقتى انا
تحياتى
عاشقة الرومانسية
هحاول اتبع الاصول بس يا ريت كل الناس تعمل كدة
ادعيلى
الشموع البيضاء
عقبالى انا كمان
اكيد انتى اكتر واحدة حاسة بيه عشان كانت ايدك فى النار زيي
تحياتى
عاشقة وغلبانة
لا انا عايزاكى تفضلى ارجوكى ممنوع الرحيل اعملى واقفة بس بدون مشى
اخيرا وقفتى فى صفى
انا مش كنت بزعل منك ابدا
يا بخت من بكانى وبكى الناس عليا ولا ضحكنى وضحك الناس عليا
اوعى تبعدى كتير
تحياتى
حياة
ربنا يخليكى يا رب اكون طيبة بجد
ويسمع منك ربنا
وشكرا على النصيحة وهحاول انفذها
واشكرك على الدعوات وربنا يجعلك نصيب منها
تحياتى
صبرنى يا رب
اة والله شكلى كدة عبيطة وانا مش واخدة بالى
لاء ما خلاص كل اللى فات كوم اللى جاى كوم
هى ادتنى فرصة عمرى
واياك حد يكلمنى بعد النهاردة وبالاخص هو
تحياتى
الربان
يا رب يكون خير من عند ربنا كل اللى جاى ومش بايدى شئ غير انى لازم استحمل عشان خاطر جوزى
واشكرك على الدعوات
تحياتى
بسمة صلاح
هو لو مش عملى كرامة واخد حقى يبقى انا كنت عملالة خاطر عالفاضى
بس هو الحمد لله مش كدة
تحياتى
ايمان
عند حقى يا ايمى يا حبيبتى
هى ادتنى فرصة عمرى ولو قعدت افكر ميت سنة قدام عشان اعمل حدود مش هعرف بس هى ادتنى الفرضة
انا مستنية 300 جنية بس مش هيد يهملها خسارة فيها
هههههههههههه
تحياتى
غروب
يا رب
بس عالفكرة كل اللى بيدعو الدعوة دى بيخدوا واحد امة عايشة
تحياتى:)
موناليزا
اتمنى ان دة اللى يحصل
وربنا يستر
تحياتى
بسمة صلاح
اية اللى غير رأيك؟؟؟؟
blue wave
شوفت الهنا اللى انا فية
بس يا رب يتمر
كلة عشان حبيبى
تحياتى
ستوتة حبيبتى
اة انا جوزى من النوع التانى
على فكرة تعليقك دة هو اللى وصلنى لقرارى الاخير
تحياتى
فتاقيت
اة خلاص كان فى وخلص انتهى الموال
هى اخدت اكتر من حقها واتعملنا معاها حلو بس هى اللى عملت كدة
تحياتى
بعبة
لا مسح متلاقيش خلاص انتهى
تحياتى
ستوتة حبيبتى
اشكرك على الادعية وانا بدعى بس الصراحة مش بكثرة
هكتر الادعية وشكرا عالنصيحة
بحبك يا ستوتة
جارة القمر
انا وانتى والشموع البيضاء فى الهوا سوا
ربنا يجمعك بيه وتكونى معاه زى الشموع
وشكرا عالنصيحة
تحياتى
اكيد
حاضر هجرب وهدعى ربنا وانا عارفة انه مجيب الدعوات
والحكاية تستاهل التعب والدعوات
تحياتى
dr dead
انا مش قدامى غير كدة
وفعلا الحمد لله انه معايا
وربنا يستر
semsema
انا هحاول اعمل كدة بس الحكاية محتاجة اعصاب وقوة تحمل
ادعيلى
dodda
ههههههههههه
معلش انا كان ممكن اعمل كدة من اول ما كلمتنى واخلى ايامها سودة
بس انا بعمل حساب العواقب
وفعلا رايي ستيتة هيساهم بشكل كبير فى قرارى
بالذات التعليق التانى ليها
تحياتى
بنت من الغربة
شوفتى خبتى
انا غلطت فى حاجات بس الجايات اكتر من الريحات
مش تزعلى اللى جاى اكتر
تحياتى
siraj
انا مش كان واضح فى كلامى ابدا انها على نياتها
مفيش حد بقى على نياتة ازاى
واحدة عمرها فوق40 سنة وعندها ست عيال على نياتها
تيجى منين دى
تحياتى
geo amr
نصيحة غالية
وعند حق بس انا صعب اكون زى الرسول صلى الله علية وسلم
بس هحاول
تحياتى
فكرة من الزمن دة
اصلى كان نفسى تكون علاقتنا حلوة
ربنا يهدينا انا وهى
تحياتى
عروسة
ربنا يبعد عنك المشاكل يا رب
فعلا اراء ستيتة حلوة
تحياتى
ليلى فى عالم ادم
يا ريت اقدر اعمل كدة
ادعيلى
سمكة واحد
ههههههههههههه
لا ء مش هديكى النص ينفع الربع
ههههه
يا رب يا مقلب القلوب يهدينى ويهديها
ادعيلى
تحياتى
britny in love
اة طبعا هى امه ومش هيقدر يستغنى عنها حتى ولو كانت غلطانة ولو عمل كدة اخاف منه
لان اللى مالوش خير فى اهلة مالوش خير فى حد
تحياتى
احساس لسة حى
لاء اضغط علية ازاى مش ينفع ابدا
وعندك حق اللى مالوش خير فى امة مالوش خير فى حد
تحياتى
hasona
اخدتهم
دى اخرتها الله يسمحك
انا لو اخدتهم هشتكى يعنى لاء طبعا
هدارى خبتى عن الناس بعد الشر عن نفسى
وانا فعلا كل اللى انا شايلة همة
هما والى ووالدتى
لازمن رد اعتبار ليهم بس ازاى وهى مش معترفة انها غلطانة
انا مش عايزاها تعتذرلى انا
انا اضغر منها وقد بنتها دة مش ينفع
لو عادى انا عايزة انشر التعليق التانى
اوك
تحياتى
hasona
نيسيت اقولك
انا عايزة ارد الزيارة
بس ملف تعريفك انت مش عاملة مشاركة لية
او ابعتلى الرابط
تحياتى
انسانة
انا عملت خطة فعلا ودة ولله الحمد بفضل تعليقاتكوا
تحياتى
barbie girl
انا اسفة عشان انا اتأخرت فى الرد اتلغبط ومش رديت عليكى سامحينى
انا فعلا مش هكلها كتير تانى حتى لما اسافر لما جوزى يكلمها هسلم عليها وبس
وهدية عيد الاام انا خلاص وصلت قرار
ومش هقدر استعجله عشان الظروف المادية
وعمرى ما اقدر انى احطة فى اخيار
حاضر هبقى زكية
تحياتى
إرسال تعليق